Keta undumyana uyu pa chithuzithuzi. Oboneka ukuti asulumenie kangi ali nu bogha? Ngimba nuwe sikubombeliwepo?— Sibombiwa na aliwesa utubalilo tumo. IBaibolo liyoba isya bandu bamo aba bali pabumanyani na Yehova. Bope ubusulumanie bwabakolile kangi bali nu bogha. Yumo ali yo Eliya. Tumanyile isya mundu uyu.

Eliya ali nu bumi bo Yesu akali upapiwa. Ahabu malafyale wa Baisraeli atiputagha kwa Kyala wabwanaloli Yehova. Ahabu nu nkasi wake Yezebeli biputagha kwa kyala wabo wabutungulu Baala. Abaisraeli abingi balyandile ukwiputa kwa Baala. Yezebeli alondagha ukughogha abandu bosa aba biputagha kwa Yehova pamopene na Eliya! Ngimba umenye isi Eliya abombile?—

 Eliya abopile! Abopile ndungalangala nukwimama ku mbako. Kwinoghona ukuti nongwa yafiki abombile isi?— Ee, ali nu bogha. Loli Eliya atalondiwagha ukuti aye mogha. Nongwa yafiki? Asimenye ukuti Kyala abaghile ukumutula. Akabalilo kamo bo isi sikali ubombiwa, Yehova anangisye amaka ghake kwa Eliya. Yehova atumile umoto ukufuma kumwanya ukwamula ulwiputo lwa Eliya. Lino Eliya amenye ukuti Yehova akuya pakumutula.

Bo Eliya ali mu mbako, Yehova amulalusisye, atile: ‘Ngimba kubomba fiki kuno?’ Eliya atile: ‘NsyeIe nimwene une ngwiputa kumyako. Ngutila bolonda ukungogha.’ Eliya inoghonagha ukuti asyele mwene bosa aba bakwiputa kwa Yehova baghoghiwe. Yehova ayobile na Eliya, atile: ‘Ayi, ubu butungulu. Abandu abangi 7,000 balipo aba bakwiputa kumyangu. Uye nkifu. Imbombo yakuti ubombe yikali yilipo!’ Ngimba kwinoghona ukuti Eliya ahobwike bo apilike isi?—

Kumanyila fiki kwa Eliya?— Ungayagha mogha. Uli nabamanyani aba bakughanile uwe na Yehova. Yehova ali na maka, akabalilo kalikosa abaghile ukutula! Ngimba uhobwike ukuti ukaya wimwene?—