Cai huahuata ricui. Paiga sapalla, manzharishca man. Canhuas chasnachu sintirishcangui... Tucuigunami imasaibiga chasna sintirinchi. Bibliaga ninmi, Jehovata tucui shunguhuan llaquic runagunahuas manzhasha, sapalla sintirishcata. Eliasmi chasna sintirira. Ricushun imata tucura.

Eliasca Jesus mana pagarishcallaita Israel llactaibimi causara. Chi punzhagunaibiga Israel llactata mandac runaga Acab mara. Pai huarmiga Jezabel mara. Ishcandi Jehovata mana llaquisha, Baal nishca yanga diosta alabac manaura. Chiraicumi Israelbi causac ashca runagunaga Baal yanga diosta alabac anaura. Acabpa huarmi Jezabelga yapa piña huarmi mara. Chiraicumi tucui Jehovata cadsuccunata huanchinata munara. Astahuanbas Eliastas huanchisha nira. Imatata Eliasca rana ara. Elias ashaga imatata canga ranguimara...

 Paiga carutami rira. Chaquishca pambama risha, urcu uctuibi miticura. Imaraicuta miticura... Manzhashcamanda. Chasna acpihuas Eliasca mana manzhana chara. Manachu Jehovaga ashca ushayuc an. Indá, ashca ushayuc man. Jehovaga ña yanapai tucushca mara. Ñaupa punzhagunaibi Elias mañacpiga, Jehovaga ahuapachamandami ninata shitara. Eliasca tucui shunguhuanmi Jehova Diospi quirina ara.

Elias chi uctui aushcaibi, Jehovaga casnami tapura: “Imahuata cai uctuibi miticungui” nisha. Eliasca nirami: “Callari punzhagunaibiga ashca runagunami canda cadsuc anaura. Cunanga sapalla mani. Ñucata huanchisha nicpimi manzhani”. Paiga Jehovata sirviccunata huin huanchishcata shinami yuyara. Jehovaga nirami: “Mana canlla changui. Canzhis huaranga (7.000) sirviccunami chara tian. Ama manzhaichu. Ñucata chara yanapana mangui” nira. Yaya Dios chita nicpiga, Eliasca imasashi sintirira... Eliasca cushiyarami.

Elias ima tucushcaibi yuyai. Imatata Eliasmanda yachanchi... Tucuigunami imasaibiga manzhasha, sapalla sintirinchi. Chasna ashaga imatata rana angui. Ama cunganguichu, mana sapalla chaungui. Jehovata llaquic, candahuas llaquic ashca amigogunatami charingui. Jehovaga tucui ushaita charishcamandami canda yanapanga. Manachu cushiyangui caita yachasha...