Ντικχ ι χουρντέ τσσαβές κι φωτογραφία. Να ντικχέσα-λες κορκορό ντα ότι νταρέλα; Τούι νιωσάλαν ποτές αντικάς;​— Σαρέ μπάζιμ νιωθίνασα αντικάς. Η Αγία Γραφή βακερέλα ότι ο Ιεχωβά τθερέλας αμαλέν σο νιωθίνενας βον-ντα νταρ ντα μοναξιά, δηλαδή ότι ισινέ κορκορέ. Εκ τανό λένταρ ισινέ ο Ηλίας. Για τι σικλιάς λέσκε.

Ο Ηλίας τζουβντιλό κο Ισραήλ μπουτ μπρεσά προτού τι μπιάντιβελ ο Ιησούς. Ο Αχαάβ, σο ισινέ βασιλιάς κο Ισραήλ, να πακιάλας κο αληθινός Ντεβέλ, κο Ιεχωβά. Βοβ, ντα λέσκι ρομνί, η Ιεζάβελ, πακιάνας εκχέ ψεύτικε ντεβλέστε, κο Βάαλ. Ο πιο μπουτ τζενέ κο Ισραήλ αρχισάλε βον-ντα τι πακιάν κο Βάαλ. Η Βασίλισσα Ιεζάβελ να ισινέ ιτς λατσσί ντα μανγκέλας τι μουνταρέλ σαρέ οντουλέν σο πακιάνας κο Ιεχωβά ντα εκ οντουλένταρ σο μανγκέλας τι μουνταρέλ η Ιεζάβελ ισινέ ο Ηλίας-ντα! Τζανέσα σο κερντάς βοβ;​—

 Νασλό σουγκό! Γκιλό ντουρ, κι έρημος, ντα γκεραντάς-πες εκχέ σπηλιάτε. Σόσκε πακιάσα ότι κερντάς-λες ανταβά;​— Αγαντάν-λες, νταρέλας. Αλλά βοβ δεν έπρεπε τι νταρέλ. Σόσκε; Επειδή τζανέλας ότι ο Ιεχωβά μπορίνελας τι βοηθίνελ-λες. Ο Ιεχωβά σικαντάας λέσκε πι ζορ. Εκ φαρ, ο Ντεβέλ απαντιντάας λέσκε προσευχιάτε όταν μπουτσσαντάας γιακ κατά ουρανός. Άρα, αγαβάσα ότι κα μπορίνελας τι βοηθίνελ-λες ακανά-ντα!

Σαρ μπεσέλας ο Ηλίας κι σπηλιά, ο Ιεχωβά κερντάς λέσαρ λάφι ντα πουτσλάς-λες: “Σο κερέσα ακατέ;” Βοβ απαντιντάς: “Σάντε με πακιάβα τούτε ακανά. Ισινόμ ντιπ κορκορό ντα νταράβα ότι κα μουνταρέν-μαν”. Ο Ηλίας αμντίνελας ότι μουνταρντέας σαρέ οντουλέν σο πακιάνας κο Ιεχωβά. Όμως, ο Ιεχωβά βακερντάς λέσκε: “Κερέσα λάθος. Γιαβέρ 7.000 τζενέ συνεχίνενα τι πακιάν μάντε. Μα ντάρα. Τθεράβα ατζέκ έργος τούκε!” Πακιάσα ότι ο Ηλίας χαιρισάλο ανταλένταρ σο ασουντάς;​—

Σο σικλιόσα σαρέ οντουλένταρ σο νακχλάς ο Ηλίας;​— Δεν πρέπει τι νιωθίνες νταρ ντα μοναξιά, δηλαδή ότι ισινάν κορκορό. Τθερέσα αμαλέν σο μανγκένα ι Ιεχωβάς ντα τουτ. Επίσης, ο Ιεχωβά τθερέλα μπουτ μπαρί ζορ, ντα πάντα κα βοηθίνελ-τουτ! Χαιρίνεσα σο τζανέσα ότι να ισινάν ποτές κορκορό;​—