MATAUPU 7
Kai Maua Aka Eiloa ne Koe se Lagonaga sē Sologa mo te Mataku?
Kilo atu ki te tamaliki tagata foliki i te ata. Ko mata sē sologa aka eiloa kae mataku, ne? Kai maua aka eiloa ne koe se lagonaga penā?— E penā eiloa a lagonaga o tino katoa i nisi taimi. E fakaasi mai foki i te Tusi Tapu a taugasoa o Ieova kolā ne maua ne latou a lagonaga sē sologa mo te mataku. E tokotasi mai i ei ko Elia. Ke onoono aka tatou ki mea e uiga ki a ia.
Ne manako a Iesepela ke tamate a Elia
Ne nofo atu a Elia i Isalaelu i se taimi leva ‵ki, a koi tuai o fanau mai a Iesu. A Aapo, te tupu o Isalaelu, ne seki tapuaki atu ki te Atua tonu, ko Ieova. A Aapo mo tena avaga, ko Iesepela, ne tapuaki atu ki te atua ‵se ko Paala. Tela la, ne kamata o tapuaki atu a te tokoukega o tino i Isalaelu ki a Paala. Ne masei ‵ki eiloa te tupu fafine ko Iesepela kae ne fia tamate ne ia a tino katoa kolā e tapuaki ki a Ieova, e aofia i ei a Elia! E iloa ne koe me ne a mea ne fai ne Elia?—
Ne tele keatea tou tagata! Ne tele eiloa ke ‵mao a ia kae ‵muni i se ana. Se a tau faka‵tau me se a te pogai ne fai ei ne ia te mea tenā?— Ao, ne mataku a ia. Kae ne seki ‵tau o mataku a Elia. Kaia? Ne iloa ne ia me ne mafai o fesoasoani atu a Ieova ki a ia. Ko oti eiloa ne fakaasi atu muamua ne Ieova tena ‵mana ki a Elia. I te taimi e tasi, ne tali atu a Ieova ki te ‵talo a Elia mai i te faka‵to ifoga o te afi mai te lagi. Tela la, ne mafai eiloa o fesoasoani atu a Ieova ki a Elia i te taimi eiloa tenā!
Ne fesoasoani atu pefea a Ieova ki a Elia?
I te taimi ne nofo atu ei a Elia i te ana, ne faipati atu a Ieova ki a ia kae fesili atu: ‘Ne a au mea e fai i konei?’ Ne tali atu a Elia: ‘Ko au fua tokotasi tenei koi tapuaki atu ki a koe. Ko au fua tokotasi, kae ko oko eiloa i toku mataku i a au ma tamate.’ Ne mafaufau a Elia me ko oti ne tamate a nisi tino tapuaki katoa a Ieova. Kae ne fai atu a Ieova ki a Elia: ‘Ikai, e se tonu te mea tenā. E toko 7,000 a nisi tino kolā koi tapuaki mai ki a au. Ke loto toa koe. E uke a nisi galuega koi ‵tau o fai ne koe!’ Se a tau faka‵tau me ne fiafia a Elia ke lagona atu te mea tenā?—
Ne a mea e mafai ne koe o tauloto mai i te mea tenei ne tupu ki a Elia?— E se ‵tau eiloa o maua ne koe se lagonaga sē sologa mo te mataku. E isi eiloa ne ou taugasoa kolā e a‵lofa ki a Ieova, e pelā foki mo koe. E lasi foki te ‵mana e maua ne Ieova, kae ka fesoasoani atu faeloa a ia ki a koe! E mata, e fiafia koe ke iloa atu me e se ko koe fua tokotasi e tapuaki atu ki a Ieova?—
