AKO 7
Neʼe Kua Ke Logoʼi Koa La Hau Mataku Moka Ke Tokotahi?
Sio ki te kiʼi toe ʼi te pakī. ʼE hage ʼe tokotahi pea mo mataku. Neʼe kua ke logoʼi koa la ia te faʼahi ʼaia?— ʼE ʼi ai pe he temi ʼe tou logoʼi e tatou fuli te faʼahi ʼaia. ʼE talanoa ʼi te Tohi-Tapu ʼo ʼuhiga mo he ʼu kaumeʼa ʼo Sehova neʼe natou toe logoʼi mo natou neʼe natou tokotahi pea mo matataku. Neʼe kau ai ia Elia. Ta vakaʼi he ʼu faʼahi ʼo ʼuhiga mo ia.
Neʼe maʼuli ia Elia ʼi Iselaele, fualoa ki muʼa atu, pea neʼe mole heʼeki tupu la Sesu ia. Ko Akapo, te hau ʼo Iselaele, neʼe mole tauhi ia kia Sehova, te ʼAtua moʼoni. Ko Akapo mo tona ʼohoana ia Sesapele, neʼe nā tauhi kia Paale, te ʼatua hala. Tokolahi ʼi te kau Iselaele neʼe natou kamata tauhi mo natou kia Paale. Ko te fineʼaliki ko Sesapele neʼe agakovi ʼosi pea neʼe ina fia matehi ia natou fuli ʼae neʼe tauhi kia Sehova, ʼo kau ai ia Elia. ʼE ke iloʼi pe kotea ʼae neʼe fai e Elia?—
Neʼe hola ia. Neʼe alu ki te toafa ʼo nono. ʼI tau manatu la, he ko ʼe neʼe ina fai ia te faʼahi ʼaia?— ʼEi, neʼe mataku ia. Kaʼe neʼe mole ʼaoga ke mataku ia Elia. Kotea tona tupuʼaga? He neʼe ina iloʼi neʼe feala kia Sehova ke tokoni ki ai. Neʼe kua fakaha e Sehova tona malohi kia Elia. ʼI te tahi lakaga, neʼe tali e Sehova ki te faikole ʼa Elia ʼo ina fakato ifo te afi mai te lagi. Koia neʼe feala pe kia Sehova ke toe tokoni kia Elia ʼi te lakaga leva ʼaeni.
ʼI te koga meʼa ʼae neʼe nono ai ia Elia, neʼe palalau age ia Sehova ʼo ina fehuʼi age: ‘Kotea ʼae ʼe ke fai ʼi heni?’ Neʼe tali age e Elia: ‘ ʼE ko au tokotahi pe ʼae ʼe kei tauhi kia koe. Ko au tokotahi pe, pea ʼe au mataku naʼa matehi au.’ Neʼe manatu ia Elia neʼe kua matehi ia natou ʼae neʼe tauhi kia Sehova. Kaʼe neʼe ui e Sehova kia Elia: ‘Kailoa ia, ko te toko 7 000 ʼe kei natou tauhi kia au. Ke ke lototoʼa. ʼE kei lahi ʼaku gaue ʼe tonu ke ke fai.’ ʼI tau manatu la, neʼe mole koa la fiafia ia Elia ʼi tana logo ki te faʼahi ʼaia?—
Kotea te ako ʼe feala ke ke maʼu mai te aluʼaga ʼae neʼe hoko kia Elia?— ʼE mole tonu ke ke manatu ʼe ke tokotahi pea mo ke mataku. ʼE ʼi ai ʼou kaumeʼa ʼe natou ʼoʼofa kia Sehova pea mo koe. Pea ko Sehova ʼe malohi ʼaupito pea ʼe tokoni tuʼumaʼu atu anai. ʼE ke fiafia koa la ʼi tau iloʼi ʼae ʼe mole ke tokotahi?—