LESIONY 7
¿Ma goyoʼ ór bidzuibylo né gosaclo que noʼlo toiblo la?
Bibiʼ mbioxien ni noʼ ló dibuj reʼ. Rienni que noʼbu toibbu né que cadzuibybu. ¿Ma goyoʼ ór bidzuibylo né gosaclo que noʼlo toiblo la?... Guiráno ma goyoʼ ór gosacno scú. La Biblia rasetlaa buñ ni bisob a Dios, né ná gondxiʼyibu Jehová láaca goyoʼyibu toibyibu né bidzuibyibu. Toibtica de layibu góc Elías. Guibiʼno xí gosaclobu.
Jezabel goniiny nagaitybu Elías
Elías xidzú bibany lainy gudx Israel dzú yása gál Jesús. Ló Dzúcu Acab buñguieeu ni buny mandary Israel né Jezabel tzeelbu diti buny adoraryibu Jehová, Dios ni rony xinésni. Layibu bienyibu dioxh ni laa Baal, ni góc toib dioxh falz. Por ngú, xidal buñ de gudx Israel láaca gosaló buny adoraryibu Baal. Jezabel tzeʼel Acab láaca nigolú buñ mal gócbu né goniiny nagaitybu guirá ni cayony adorar a Jehová. Né como Elías buny xchiin Jehová, ¡láaca goniiny nagaitybu Elías! ¿Xí láani ñony Elías ór cú? Looy, ¿xí láani ñonylo?...
Elías golsit de lagarycu. Bixonybu seebu ló yoovich né bicachlanbu lainy toib bileʼ. Xpensarylo, ¿xigony bicachlan Elías?... Portín bidzuibybu. Per diti goyoʼ razón par nadzuibybu. ¿Xigony yaca? Portín gonbu que Jehová noʼ par gacné láabu. Jehová ma buny láani toib buelt. Toib ór Elías gonab xcalrracné Jehová, né láabu cuapybu portín bixelbu guii desde guibá. ¿Rienni que Jehová nap xiroʼgolu galnadip la? Scú láani. ¡Elías gopbu razón par gapbu confianz lóo Jehová!
¿Ximod gocné Jehová a Elías?
Órni Elías ma noʼ lainy bileʼ cú, Jehová gonabdiitz láabu: Elías, ¿xigony noʼlo reʼ? Láabu cuapybu: Antes goyoʼ buñ ni buny adorar looy, per nigoreʼ ma tobi biaʼanna. Né láaca radzubi guigaityibu naʼ. Xpensary Elías guirá ni buny adorar a Dios ma goity. Per Jehová cuapy láabu: Yaca, diti nosi looy biaʼanlo. Noʼsa gatzmil buñ ni rony adorar naʼ. Diti guidzuibylo, portín napa toib dxiin par looy. Xpensarylo, ¿ximod gosac Elías órni Jehová góoch láabu ndeʼ?... ¡Sigory nigolú bibaladxbu!
Nigoreʼ buny pensary ni gosaclóo Elías. ¿Xí labúu guisuidylo de láani?... Que sioʼ ór guidzuibylo né guisaclo que noʼlo toiblo. Per bisetnaladx ndeʼ: noʼ ximiglo ni nadxiʼ a Jehová né láaca ronladxyibu looy. Láaca diti guialadxlo que Jehová nap xiroʼgolu galnadip né sacnébu looy guirá ór. ¿Rabaladxlo ni nanlo que diti sioʼ dzú siaʼanlo toiblo la?...
