PWONY 6
Daudi Pe Obedo Lwor
Ngo ma itimo ka lworo omaki?— Iromo ringo bot babani nyo mamani pi kony. Ento tye ngat mo mukene ma bene twero konyi. En tek loyo dano mo keken. In ingeyo ngat meno?— Ee, ngat meno aye Lubanga Jehovah. Kong waloku i kom latin awobi mo ma i Baibul ma nyinge Daudi. En ongeyo ni Jehovah bikonye kare ducu, ci en pe obedo lwor.
Nicakke ma Daudi pud tidi, lunyodone gupwonye me maro Jehovah. Man okonyo Daudi me bedo ma cwinye tek kadi bed en orwatte ki jami ma kelo lworo. Daudi onongo ngeyo ni Jehovah obedo Lareme dok twero konye. Nino mo acel, i kare ma Daudi onongo tye ka kwayo romi, labwor madit obino otingo romo acel i doge! Tika ingeyo gin ma Daudi otimo? En oryemo kor labwor-ni ci oneko woko ki cinge! Dok i nino mukene ma nguu mito mako romo, Daudi oneko nguu meno bene! Itamo ni anga ma okonyo Daudi?— Ee, obedo Jehovah.
I nino mukene Daudi onyuto tekcwiny i yo mapat. Jo Icrael onongo gitye ka lweny ki rok ma kilwongogi ni jo Piliciti. Lalweny mo acel i kin jo Piliciti obedo laco mo ma kome dit, dok bor bor mo! Nyinge Goliac. Twon oteka man onongo tye ka yeto Jehovah ki lulweny me Icrael. Goliac obedo ka nyero lulweny me Icrael kun wacci gubin gulweny i kome ka gitwero. Ento jo Icrael ducu onongo lworo omakogi matek mada ma pe gitwero lweny i kom Goliac. I kare ma Daudi owinyo lok man, en owaco bot Goliac ni: ‘Abilwenyo i komi! Jehovah bikonya, ci abiloyo lweny!’ Itamo ni Daudi onyuto tekcwiny?— Kakare, cwinye obedo tek. Tika imito ngeyo gin mutimme lacen?
Daudi owoto del me celo kidi ma kilwongo ni latangdiyo, ki kidi laling ling abic, ci en ocito ka lweny i kom Goliac. I kare ma Goliac oneno ni Daudi obedo latin matidi, en ocako nyero Daudi. Ento Daudi owacce ni: ‘Ibino ka lweny kweda ki pala lucwan, ento an abino boti i nying Jehovah!’ En oketo kidi i delle, ocako ngwec me cito tung bot Goliac, ci owiro obayo i kome. Kidi ocelo Goliac i tur nyime! Twon oteka-ni otugi poto i ngom, ci oto woko cutcut! Lworo omako jo Piliciti ci gin ducu guringo woko. Daudi ma obedo awobi matidi mo, oloyo oteka lweny meno nining?— Jehovah aye okonye, dok Jehovah onongo tek loyo oteka meno woko!
Daudi pe obedo lwor pien onongo ngeyo ni Jehovah bikonye
Ngo ma wapwonyo ki i lanen pa Daudi?— Jehovah tek loyo ngat mo keken. Dok en Laremi. Pi man, nino mo ka lworo omaki, wi opo ni, Jehovah twero konyi me bedo ki tekcwiny!
