Sɛ wʋ kunlu itu a, mɩnla yɛ ɛyɛ a?— Ebiye a, ɔkɔ wʋ maamɩ nɩɩ wʋ papa bɛ ɛkɛnɩ kɛɛ bɔwʋwa wʋ. Naasʋ̃, abiye wɔ ɛkɛnɩ mɔɔ ɩkɔhʋla ɩkɔwʋwa wʋ. Ɩnwʋ yɛ ɛzɩzɩbɛ kezile ɩtɛla abiyela. Ezi enii ɔkʋ̃ nɩ yɩ a?— Amba, ɩdɩ Gyehova Nyamɩnlɩ. Ma yɛhã pavʋlɔ be mɔɔ ɩnwʋ ndwokɔ wɔ Bayɩbʋlʋ yɩ nu mɔɔ bɔfʋlɔ yɩ kɛɛ Devidi ɩnwʋ odwokɔ. Na nɩ izi kɛɛ Gyehova ɩkɔwʋwa yɩ eɣile bela, meti nɩ ikunlu ádu.

Ɔzʋmɩ mmɩlɩ mɔɔ nɩ Devidi ɩdɩ kuakula ɛgyɩkɩ̃ɩ̃ nɩ, yɩ awʋvʋlɔ behilehileli yɩ ma ɩlɔlɩ Gyehova. Eyi ɩwʋwalɩ yɩ ma mmɩlɩ po mɔɔ nninyeni ɛyɛlɛyɛlɛ ɩdʋdʋlɩ yɩ nɩ, Devidi yɩ kunlu átu. Nɩ izi kɛɛ, Gyehova ɩdɩ yɩ ɔhɔnwʋ na ɩzɔ ti, sa ɩbʋwa yɩ. Eɣile ɔkʋ̃ be mɔɔ nɩ Devidi ikilaa mmuwuanɩ be bɔzʋ nɩ, anwɩnadɩ kezile be ɩɣa ɩhyɩlɩ mmuwuanɩ yɩ be! Ezi mɔɔ Devidi ɩyɛlɩ a? Ɩdʋwalɩ anwɩnadɩ nɩ na ɩkɛyɛ kɛɛ ɩvalɩ yɩ sa mbʋanlɩ ihunli yɩ! Akʋ̃ sʋ̃, mmɩlɩ mɔɔ sʋmʋlɔ be ɩɣalɩ mmuwuanɩ bɔzʋ nɩ, Devidi ihunli yɩzayɩ sʋ̃! Aninyia yɛɛ ɔdwɩnɩ kɛɛ ɩwʋwalɩ Devidi a?— Amba, nɩ ɩdɩ Gyehova.

Na mmɩlɩ ɔkʋ̃ be sʋ̃ nɩ, Devidi ɩlalɩ akɛnɣazɩzɩbɛ kezile be ali. Nɩ Yizilayamaa bɛ nɩɩ mmenii be mɔɔ nɩ bɔfʋlɔ bɛ kɛɛ Fɩlɩsɩtiyiamaa nɩ bɔkɔhʋ̃. Nɩ Fɩlɩsɩtiyianɩ azogyiamaa yɩ nɩ bonu ɔkʋ̃ be ɩdɩ benyia kɔbɩlanɩ mɔɔ ɩdɩ tɩndɩnlɩ baaba! Bɔfʋlɔ yɩ kɛɛ Golayatɩ. Nɩ ɔzɔ kɔbɩlanɩ nɩ idii Yizilaya azogyiamaa nɩɩ Gyehova bɔnwʋ ɛɣɛlɛ. Golayatɩ ɩhanlɩ ihileli Yizilaya azogyiamaa nɩ kɛɛ, sɛ abiye ɩdɩ benyia a, ɩɣɩla yɩ anyunu na ɩ nɩɩ yɩ bɔhʋ̃. Naasʋ̃, nɩ Yizilayamaa munwatĩĩ bo kunlu idu baaba kɛɛ bɛ nɩɩ yɩ kɔhʋ̃. Mmɩlɩ mɔɔ Devidi ɩdɩlɩ ɔzɔ odwokɔ yɩ nɩ, ɩhanlɩ ihileli Golayatɩ kɛɛ: ‘Mɩ  nɩɩ wʋ kɔhʋ̃! Gyehova ɩkɔwʋwa mɩ, na mikeli wʋ zʋ nkunimi!’ Ekila a, nɩ Devidi ɩwɔ akɛnɣazɩzɩbɛ a?— Amba, nɩ ɩwɔ akɛnɣazɩzɩbɛ baaba. Ɛpɛyɩ kɛɛ ɔnwʋ mɔɔ izili dɔkʋ̃ a?

Devidi ɩvalɩ yɩ tayɩ na ɩzɩzalɩ awʋlɔ namʋʋ anlu, na ɩhɔlɩ kɛɛ ɩ nɩɩ kɔbɩlanɩ yɩ nɩ kɔhʋ̃. Mmɩlɩ mɔɔ Golayatɩ ɩnwʋnlɩ kezimɔ Devidi ɩdɩ kuakula nɩ, ɩzɩlɩlɩ Devidi. Naasʋ̃ Devidi ɩhanlɩ ihileli yɩ kɛɛ: ‘Kʋ̃nɛ afɩna yɛɛ ɛlɛ ɛba mʋ zʋ a, naasʋ̃ mamɩ mɛyɩ, mɩba wʋ anyunu wɔ Gyehova yi dima nu!’ Akʋ̃, ɩvalɩ bʋlɔ yɩ nɩ iwulalɩ yɩ tayɩ yi nu, iduli tɔlɔnwa ɩhɔlɩ Golayatɩ ɩzʋ, na ɩdʋlɩ yɩ senyii ɩhɔlɩ yɩ zʋ. Bʋlɔ yɩ nɩ ɩhɔlɩ ɩwɔlɩ Golayatɩ yɩ bʋma zʋ! Kɔbɩlanɩ  nɩ ɩdɔlɩ azɩ na iwuli! Fɩlɩsɩtiyiamaa yɩ nɩ bokunlu iduli, na meti bo munwatĩĩ benɣiandinli. Kɛ ɩyɛlɩ mɔɔ kuakula benyia mɔɔ ɩdɩ kɛɛ Devidi nɩ ɩhʋlalɩ ilili kɔbɩlanɩ yɩ zʋ nkunimi a?— Gyehova ɩwʋwalɩ yɩ, na nɩ Gyehova ɩnwʋ ɩyɛ ɛzɩzɩbɛ kʋlaa ɩtɛla kɔbɩlanɩ yɩ nɩ!

Mɩnla yɛ ɔkɔhʋla okozuma wɔ Devidi yɩ odwokɔ yi nu a?— Gyehova ɩnwʋ ɩyɛ ɛzɩzɩbɛ baaba ɩtɛla abiyela. Na ɩdɩ wʋ ɔhɔnwʋ. Meti eɣile bela mɔɔ wʋ kunlu ikodu nɩ, kakɛ kɛɛ, Gyehova ɩkɔhʋla ɩkɔwʋwa wʋ ma ekenyia akɛnɣazɩzɩbɛ!