¿Ajjsarayasirïtati?... Ukhaman uñjasisajja, tatamampi mamamampiw yanaptʼayasirïpachätajja. Ukampis mayniw yanaptʼañ munaraktamjja, Jupjam chʼamanejj janiw khitis utjkiti. ¿Khitïpachasa?... Jïsa, Jehová Diosawa. Bibliajja, David sat jan ajjsarir mä waynitutwa parli. “Jehová Diosajj yanaptʼapunitaniwa” sasaw jupajj taqe chuym confiyasïna.

Tatap mamapajj wawatpachwa Davitarojj Jehová Diosar munasiñapatak sum yatichapjjäna. Ukaw Davitarojj jan ajjsarirïñapatak yanaptʼäna. “Jehová Diosajj amigojawa, jupaw yanaptʼitani” sasaw jupajj sirïna. Mä kutejja, Davitajj uwijanakap awatiskäna, ukhaw mä jachʼa leonajj mä uwijap aparäna. ¿Kunsa Davitajj lurpachäna? Leonar arktasaw amparapamp jiwayäna. Mä osorakiw uwijanakaparojj manqʼantañ munäna, uka osorusti jiwayarakïnwa. Ukanak lurañatakejj ¿khitis Davitar yanaptʼpachäna?... Jehová Diosaw yanaptʼäna.

Israelitanakajj filisteonakampi nuwasipkäna ukhaw Davitajj jan ajjsarirïtap uñachtʼayarakïna. Filisteonakan ejercitopanjja, Goliat sat mä chachaw utjäna. Jupajj wali jachʼa jaqepunïnwa. Israelitanakatsa Jehová Diosatsa akham sasaw sawkasïna: “¿Khitis nayampi nuwasini?” sasa. Juparusti taqeniw ajjsarapjjäna, janirakiw khitis jupamp nuwasiñ munkänti. Ukampis Davitajj ukanak istʼasaw uka chachar akham säna: “¡Nayaw jumamp nuwasï! ¡Jehová Diosan yanaptʼapampiw atipjäma!” sasa. ¿Davitajj ajjsarirïnti?... Janiw ajjsarirïkänti. ¿Kunas Davitamp paspachäna uk yatiñ munasmati?

Davitajj phesqa qalanakampi ukat mä qʼorawampiw uka jachʼa jaqemp nuwasir saräna. Goliatajj Davitar uñjasajj wal larusïna. Ukampis Davitajj akham sänwa: “Jumajj espadampiw nayamp nuwasir juttajja, ukampis nayajj taqe chʼamani Tatit Diosan sutipjjaruw juttjja” sasa. Ukatsti, mä qalamp qʼorawtʼasajja, ¡parapatwa Goliatar waktʼayäna! Ukhamaw  uka jaqejj jiwjjäna. Filisteonakajj uk uñjasajj wal ajjsarapjjäna ukat tʼijtjjapjjänwa. ¿Kunjamatsa Davitajj uka jachʼa jaqer atipjpachäna?... Jehová Diosaw yanaptʼäna. ¡Jupaw jachʼa jaqenakat sipansa jukʼamp chʼamanejja!

¿Kunsa Davitan sarnaqäwipajj yatichistu?... Jehová Diosaw khitit sipansa jukʼamp chʼamanejja. Ukhamajj kunapachatï ajjsarayasïta ukhajja, ak amtañamawa: Jehová Diosajj amigomawa ukat jan ajjsarañamatakiw yanaptʼätam.