Yéning cening marasa takut, biasané kéngkén abeté?— Bisa dogén ngidih tulung tekén mémé bapa. Kéwala, ada masih anak lénan ané bisa nulungin cening, ia joh kuatan tekén nyénja. Apaké cening nawang nyén ento?— Ento tuah Ida Yehuwa. Mai baca kisah unduk anak bajang ané ada di Cakepan Suci ané madan Daud. Ia pracaya yén Yehuwa terus lakar nulungin ia, dadiné ia tusing marasa jejeh.

Uli Daud enu cenik, mémé bapané suba ngajahin ia nyayangin Yehuwa. Ené ané ngranaang Daud tusing jejeh yadiapin nepukin unduk ané nakutin. Ia nawang yén ngelah hubungan ané luung ajak Yehuwa, ia lakar tulungina. Taén, dugas Daud sedek nyaga domba-dombané, ada singa gedé teka nyaplok dombané! Tawang cening, kéngkén reaksiné Daud? Ia nguber singané ento lantas matianga! Lan dugas ada beruang nyagrep dombané, Daud masih ngamatiang beruangé ento! Menurut cening nyén ané nulungin Daud?​— Pasti Ida Yehuwa.

Di waktu ané lénan, Daud buin nunjukang rasa wanén ané gedé. Dugas bangsa Israel sedek masiat ajak anak Pilistin, ada prajurit Pilistin ané awakné gedé tegeh, cara raksasa! Adané Goliat. Raksasané ené ngedékin prajurit Israelé lan ngéjék Yehuwa. Goliat nangtangin prajurit Israel apang nglawan ia. Ditu bangsa Israel makejang takut tekén ia. Dugas Daud ningeh unduké ento, ia ngomong tekén Goliat kéné: ’Icang lakar nglawan cai! Yehuwa ané nulungin icang, icang lakar ngalahang cai!’ Menurut cening apaké Daud wanén?​— Ao, wanén gati. Apaké cening dot nawang kéngkén dadiné?

Daud nyemak blangsutné lan batu nyelig lelima, lantas ia pesu nglawan raksasané ento. Dugas Goliat ningalin Daud ané bajang, ia kedék ngeréméhang Daud. Suba kéto, Daud ngomong kéné: ’Cai nglawan icang baan pedang, kéwala icang nglawan cai baan  adan Yehuwa!’ Lantas ia masang batu di blangsutné, malaib nyabat Goliat, lan batuné ento ngenain gidatné. Raksasané ento bah langsung mati! Bangsa Pilistinné ketakutan lantas makejang malaib. Kenapa anak bajang cara Daud bisa ngalahang raksasa?​— Yehuwa nulungin ia, lan Yehuwa joh lebih kuat tekén raksasané ento!

Apa ané cening bisa plajahin uli ceritané Daud?​— Sing ada ané kuatan tekén Yehuwa. Lan Ida timpal ceningé. Yén cening marasa jejeh, ingetangja yén Yehuwa lakar nulungin cening apang wanén!