Mba a ra ko bεrum mù n nun mɔ̀?— Sɔrɔkudo, a ra somiru kasuwa wunɛn yaayi ka wunɛn baaban mi. Adama, goo maa wãa wi u koo kpĩ u nun somi. U baawure kpuro dam kere. A yɛ̃ro yɛ̃ ro?— Oo, Yehofa Gusunɔwa. A de su aruwaasi goon gari ko, ba wi soka Bibeli sɔɔ, Dafidi. U raa yɛ̃ ma Yehofa u koo wi somi baadomma, yen sɔ̃na bɛrum kun wi kue.

Saa Dafidin wɛ̃run diya, win mɔwɔba wi keu sɔ̃ɔsi u ka Yehofa kĩa. Yen sɔ̃na bɛrum mu ku ra Dafidi mwɛ, baa u n ka gãa bɛrumginu yinna. U yɛ̃ ma Yehofa u sãawa win Bɔrɔ ma u koo nùn somi gãanu kpuro sɔɔ. Sɔ̃ɔ teeru, sanam mɛ Dafidi u yãanu kparamɔ, gbee sunɔ bɔkɔ ga na ma ga yãa teeru nɔɔ bɛri! A yɛ̃ mba Dafidi u kua? U gbee sunɔ ge naa gira, ma u ge go. Sa tamaa ka win nɔma tɔnawa u ge go! Yen biru gbeeku yaa gɔba ya maa yãa gɔ̃ɔ dua. Dafidi u yen tii go! Wunεn bwisikunu sɔɔ, warà u Dafidi somi?— Geema, Yehofawa.

Saa gaa maa wãa ye sɔɔ, Dafidi sɔ̃ɔsi ma wi, wɔrugɔwa. Isireliba ba raa ka tɔn be ba mɔ̀ Filisitiba tabu mɔ̀. Filisitiban tabu kowo goo u gunia sere n banda, u sãawa doogon tii tii! Win yĩsira Goliati. Doogo wi u Isireliban tabu kowobu ka Yehofa yaakoru mɔ̀. Goliati u nɛɛ, Isireliban tabu kowo wi u koo kãku, u na u ka wi sanna. Adama, Isireli ben goo sari wi u kpĩa u wi susi, bɛrum sɔ̃. Saa ye Dafidi u Goliatin gari yi nua, u wi wisa u nɛɛ: ‘Kon ka nun sanna! Yehofa koo man somi n ka nun kamia!’ A bwisika ma Dafidi u wɔrugɔru sɔ̃ɔsi mini?— Geema, wɔrugɔn tii tiiwa! A kĩ a tubu mban koora yen biru?

Dafidi u win kpee fundu sua ka kpee gori nɔɔbu, ma u yara u doogo wi susi u ka wi sanna. Sanam mɛ Goliati u wa ma Dafidi u sãawa aruwaasi kpɛmbu, u wi yaakoru kua. Adama, Dafidi u wi sɔ̃ɔwa u nɛɛ: ‘Wunɛ wee a ka man sannɔ wee ka takobi, adama, nɛ na ka nun sannɔ weewa ka Yehofan yĩsiru.’ Yen biru Dafidi u kpee gora teeru doke win kpee fundu sɔɔ, ma u duka da Goliatin beragia ma u wi te kara. Kpee te ta da tururu ma ta wi so win sirirɔ, win nɔnin baa sɔɔ! Doogo  wi u wɔra temɔ, u gu! Bɛrum mu Filisiti be mwa ma be kpuro ba duka yarina. Amɔsunwa aruwaasi kpεmbu nge Dafidi u kpĩa u doogo win bweseru kamia?— Yehofawa u wi somi, Yehofa u dam mɔ too u doogo wi kere!

Sɔ̃ɔsi terà kaa kpĩ a sua saa Dafidin faagi yen min di?— Yehofa u baawure kpuro dam kere. U maa kpam sãa wunɛn Bɔrɔ. Yen sɔ̃, tɔ̃ɔ te bɛrum mu koo maa nun mwa, a yaayo ma Yehofa u koo kpĩ u nun somi a n ka wɔrugɔru mɔ!