PARSIAJARAN 6
Habaranion ni si Daud
Molo mabiar hamu, aha do na diulahon hamu?— Ra, dilului hamu ma bapak manang omak. Alai, asing ni nasida, adong do muse na boi mangurupi hamu. Ibana do na umgogo sian manang ise pe. Diboto hamu do ise ibana?— I ma, Debata Jahowa. Tajaha ma sarito na tarsurat di Bibel taringot sahalak baoa na poso na margoar si Daud. Ala marhaposan tu Jahowa do si Daud, ndang gabe parbiar ibana.
Natuatuana do na mangajari si Daud mangkaholongi Jahowa, on mangurupi si Daud barani nang pe adong na parohon biar tu ibana. Diboto ibana do molo Jahowa alealena jala sai urupan ni Jahowa do ibana. Tingki marmahan si Daud, ro ma singa dohot gompul manoro birubiruna! Diboto hamu do aha na diulahon si Daud? Nang pe ibana ndang mamboan senjata, dilele jala dipamate ma singa dohot gompul i! Molo pandapotmu, ise do na mangurupi si Daud?— Jahowa.
Alai, adong do na asing na patuduhon habaranion ni si Daud. Tingki marporang halak Israel dohot halak Palistim, adong sada tentara ni halak Palistim na timbo na bolon, raksasa! Goarna si Goliat. Direhei raksasa on do tentara ni halak Israel jala direhei Jahowa. Didok si Goliat ma tu tentara ni halak Israel, asa ro mangalo ibana. Alai, ndang adong agia sada sian nasida na barani laho mangalo. Tingki dibege si Daud i, didok ma tu si Goliat: Ahu ma na mangalo ho! Jahowa do na mangurupi ahu laho pataluhon ho! Molo pandapotmu, tutu do barani si Daud?— I do, barani do ibana. Lomo do roham mamboto aha na masa muse?
Dibuat si Daud ma ambalangna dohot lima batu na landit, dung i ro ma ibana mangalo raksasa i. Ala poso dope si Daud, direhei si Goliat ma ibana. Alai, didok si Daud ma: Ho ro tu ahu mangasahon podang, alai ahu ro tu ho mangasahon goar ni Jahowa! Dung i, dibahen ibana ma batu i tu ambalangna, marlojong ma ibana, jala diambalangkon ma batu i tu si Goliat. Hona ma batu i pas tu pardompahan ni si Goliat! Madabu jala mate ma si Goliat! Gabe mabiar ma halak Palistim i, jala lari ma nasida. Nang pe poso si Daud, boasa ibana boi monang mangadopi si Goliat?— Ala diurupi Jahowa ibana, jala Jahowa do na umgogo sian raksasa i!
Ndang mabiar si Daud ala porsea ibana molo Jahowa sai mangurupi ibana
Aha do na taparsiajari sian si Daud?— Jahowa do na umgogo sian manang ise pe. Jala, alealeNa do hamu. Jadi, ingot ma molo mabiar hamu urupan ni Jahowa do hamu asa barani!
