Ano an ginigibo mo pag natatakot ka?— Siguro nagdadalagan ka ki Mama o Papa para tabangan ka. Pero igwa pa nin saro na makakatabang man saimo. Siya an pinakamakusog sa gabos. Aram mo kun si’say siya?— Iyo, an Diyos na Jehova. Hilingon ta an istorya kan sarong solterito sa Bibliya na an pangaran David. Aram niya na pirmi siyang tatabangan ni Jehova, kaya dai siya natatakot.

Akion pa si David tinutukduan na siya kan mga magurang niya na mamutan si Jehova. Nakatabang ini ki David na dai matakot dawa may mangyaring nakakatakot. Aram niya na Amigo niya si Jehova asin tatabangan Niya siya. Sarong beses, kan si David nagbabantay nin mga karnero, uminabot an sarong dakulang leon tapos sinakmal kaini an sarong karnero! Aram mo kun ano an ginibo ni David? Linapag o binukod niya an leon asin, puwedeng paagi sana kan kamot niya, ginadan niya ini! Tapos kan igwa man nin oso na nag-atake sa mga karnero, ginadan man iyan ni David! Sa hiling mo, si’say an nagtabang ki David?— Iyo, si Jehova.

May saro pang beses na dai talaga natakot si David. Nakikilaban kaidto sa mga Filisteo an mga Israelita. An saro sa mga suldados na Filisteo halangkawon, sarong higante! Goliat an pangaran niya. Pigkakantiyawan ni Goliat an mga suldados na Israelita saka si Jehova. Pig-angat niya an mga suldados na labanan siya. Pero takuton saiya an gabos na Israelita. Kan madangog iyan ni David, sinabihan niya si Goliat: ‘Lalabanan taka! Tatabangan ako ni Jehova kaya madadaog taka!’ Sa hiling mo, makusog daw an buot ni David?— Iyo, makusugon an buot niya. Gusto mong maaraman an sunod na nangyari?

Kinua ni David an lagpitaw niya, nagkua nin limang makinis na gapo o bato, tapos hinampang an higante. Kan mahiling ni Goliat na akion pa si David, pigparakantiyawan niya si David. Pero sinabi ni David: ‘Lalabanan mo ako gamit an espada mo, pero lalabanan taka sa pangaran ni Jehova!’ Tapos linagan niya nin gapo an lagpitaw, nagdalagan parani ki Goliat, dangan pigtarget  an higante. Tinamaan si Goliat sa mismong angog niya. Buminagsak an higante, gadan! Sa grabeng takot, nagdurulag an mga Filisteo. Pa’no nadaog nin solteritong arog ni David an sarong higante?— Tinabangan kaya siya ni Jehova, saka talagang mas makusog si Jehova kisa sa higanteng idto!

Ano an manunudan mo sa istorya ni David?— Si Jehova an pinakamakusog sa gabos. Saka Amigo mo siya. Kaya pag natatakot ka, tandaan mo na kaya kang tabangan ni Jehova na dai matakot!