PELAJAREN 6
Daud La Perbiar
Kai si ilakokenndu adi kam mbiar?— Banci saja idaramindu nande ntah pe bapandu. Tapi, selain kalak e, lit denga si banci nampati kam. Gegehen ia asangken ise pe. Ietehdu ise Ia?— Ue, Ia Dibata Jahwe. Mari sioge cerita i bas Pustaka si Badia kerna sekalak anak muda si gelarna Daud. Tek ia maka Jahwe lalap nampati ia. Daud pe jadi kalak si la perbiar.
Mulai kitik-kitikna nari, orang tuana ngajari ia gelah ngkelengi Jahwe. Emaka, sanga Daud ngadapi keadan si ngeri, la ia mbiar. Ietehna maka Jahwe e temanna, emaka Jahwe pasti lalap nampati ia. I bas sada wari, sanga Daud paksana mpermakani biri-birina, lit sada singa si galang si njerngem ras mbaba kiam biri-birina! Tehndu nge kai si ilakoken Daud? Iayakina singa e janah ibunuhna alu tanna! Kenca si e, sanga sada beruang njerngem biri-birina, ibunuh Daud ka beruang e! Menurutndu, engkai maka Daud banci perpang?— Ue, erkiteken Jahwe nampati ia.
I bas pudi wari, icidahken Daud ka maka ia perpang. Paksa si e, kalak Israel sangana erperang ras kalak Pilisti. Lit sada tentera Pilisti si seh kal mbestangna, ia raksasa! Gelarna Goliat. Raksasa e nggombangi tentera Israel ras megombang man Jahwe. Goliat pe nantang tentera Israel. Tapi, la lit kalak Israel si pang ngelawan ia. Sanga ibegi Daud kerna si e, ikatakenna man Goliat, ’Kulawan kam! Pasti isampati Jahwe aku, kam pasti talu!’ Menurutndu, perpang nge Daud e?— Ue, seh kal perpangna. Mari sinehen kai si terjadi seterusna.
Ibuat Daud kalimbawang, ntah pe alat mbenterken batu, ras lima ngkibul batu si melinang. Kenca si e, ideherina raksasa e. Goliat nggombangi Daud erkiteken ia nguda denga kal. Tapi, nina Daud, ’Kam reh alu pedang, tapi aku reh alu gelar Jahwe!’ Kenca si e itamana batu i kalimbawangna, janahna kiam, ibenterkenna batu e ku arah Goliat. Batu e tepat kena ku perdempaken raksasa e! Goliat ndabuh ku taneh janah mis mate! Kalak Pilisti pe mbiar ras kiam. Engkai anak si nguda denga bagi Daud banci naluken raksasa si seh kal galangna bagi Goliat?— Erkiteken Jahwe nampati ia. Jahwe ndauh gegehen asangken raksasa e!
Daud la mbiar erkiteken tek ia maka Jahwe banci nampati ia
Kai si banci sipelajari i bas cerita Daud nari?— Jahwe gegehen asangken ise pe. Janah, Ia temanndu. Jadi inget ya, adi mbiar kam, Jahwe pasti banci nampati kam gelah la mbiar!
