Cosa tu ta hace si ta tiene tu miedo?— Siguro, ta anda tu con el de tuyu tata’y nana. Pero tiene pa otro quien puede ayudá contigo. Mas mafuerza pa le maskin con quien. Sabe ba tu si quien le?— Si Dios Jehova. Na Biblia, puede kita le el istoria acerca na un joven, si David. Sabe le que ayudá con ele pirmi si Jehova poreso gendeh le ta tiene miedo.

Desde bata pa si David, ta enseña ya con ele el de suyu mayores que ama con Jehova. Ya ayudá este con David para gendeh tiene miedo maskin pa manada maga makamiedo cosas que ya pasa con ele. Sabe le que Amigo de suyu si Jehova y hay ayudá gayot con ele. Un dia, cuando ta vicia si David maga carnero, ya llega el un grande león y ya saca con el un carnero. Sabe ba tu si cosa ya hace si David? Ya hace le apas con el león y ya mata con este usando su mismo mano! Y cuando ya ataca el un oso con el carnero, ya mata tambien si David con este! Quien gahah el ya ayudá con David?— Si Jehova.

Ya queda tambien valiente si David cuando yan guerra el maga Israelita contra na maga Filisteo. Un soldao Filisteo el bien alto, un gigante! Goliat el de suyu nombre. Este gigante ta gangguia con Jehova y con el maga soldao Israelita. Si Goliat ta convida con el maga soldao Israelita que invisti con ele. Pero nuay quien ta atreve cay todo sila ta tiene miedo. Cuando ya sabé este si David, ya habla le con Goliat: ‘Hay invisti yo contigo! Ayudá conmigo si Jehova y hay hace yo contigo perde!’ Valiente ba si David?— Si, bien valiente gayot le. Quierre ba tu sabé si cosa ya pasa despues?

Ya saca si David con el de suyu tirador, ya pipina cinco liso piedra y ya anda con el gigante. Cuando ya mira si Goliat que bien joven pa si David, ya gangguia le con este. Pero ya habla con ele si David: ‘Si tu ya vene aqui llevando de tuyu espada, iyo ya vene llevando el nombre de Jehova!’ Despues, ya pone le  piedra na tirador, ya corre para con Goliat y ya tira con el piedra. Ya tupa este na frente de Goliat! El gigante ya tumba y ya muri! Cuando ya mira este maga Filisteo, ya tiene gayot sila miedo poreso ya corré sila. Porque man ya perde el gigante con David?— Ya ayudá si Jehova con David y mas mafuerza si Jehova contra con aquel gigante!

Cosa tu ya puede aprende na istoria de David?— Mas mafuerza si Jehova maskin pa con quien. Y Amigo le de tuyu. Poreso si ta tiene tu miedo, acorda que ayudá contigo si Jehova queda valiente!