U maha txani ngako u txi thuka u thava?— Ku ti lava u ya ka mame ni papa ti to ve ya kulamulela. Kambe ku ni mmwani wu a nga kulamulelako. Ene a ni mtamo wa hombe kupinda votshe. Wa m’ziva m’thu wa kona?— Ina, i Jehovha Txizimu. Konkuwa he bhule ngu mfana wu ditina dakwe di nga bhalwa mu ka Bhiblia i ku Dhavhidha. Ene a ti ti ziva ti to Jehovha a ndina mu vhuna mbimo yotshe, se a si thavi.

Kukhukhela i ti ngadi mwanana, Dhavhidha a gondisilwe ngu vaveleki vakwe kudhunda Jehovha. Eto ti mu vhuni ku a si thavi hambi ku txo humelela timhaka to thisa. Ene a ti ti ziva ti to Jehovha i mngana wakwe ni ku a na m’vhuna. Ditshiku dimwani Dhavidha a txi dyisa tinvuta, kuhumelete ngonyamo ya hombe yi ta ñola nvuta! Wa ti ziva ti Dhavhidha a nga maha? Ene a to vharula txisofu txa ngonyamo e tshumela e yi daya. Ni ku ditshiku dimwani txihari tximwani txa hombe txi to ñola txinvutana, se ene a to txi daya. U pimisa ti to i mani a nga vhuna Dhavhidha?— Ditshuri, i Jehovha.

Kambe ku ni mhaka yimwani ayi ti nga txi lava ti to Dhavhidha a si thavi. Vaisrayeli va ti lava ku ya lwa ni Vafilista. Ka masotxhwa a Vafilista ku ti ni wamwamna wo lapha ngutu kupinda mamwani, i ku Goliya. Ene a ruketete masotxhwa a Vaisrayeli ni Jehovha. Goliya a ti khene a nga xula otshe masotxhwa a Vaisrayeli. Se votshe Vaisrayeli va ti mu thava. Kambe mbimo yi Dhavhidha a nga pfa ti ti nga wombwa ngu Goliya, a m’xamute a txi khene: ‘Ani na lwa ni nawe! Jehovha a na ni vhuna, ni na kuxula!’ U pimisa ti to Dhavhidha a si thavi?— Ina, a si thavi. Se wa ti lava kuziva ti ti nga maheka?

Dhavhidha a to teka txibhalakaza txakwe ni 5 wa marigwi, e tsula e ya lwa ni Goliya. Se mbimo yi Goliya a nga wona Dhavhidha a to m’seka nguko i nga ti mfana. Kambe Dhavhidha a m’gete tiya: ‘Awe u ta kwangu ngu ditxhari, kambe ani ni ta kwako ngu ditina da Jehovha!’ Se ene a to teka dirigwi e beta ka txibhalakaza,  e tutuma e tsula ka Goliya, e m’txopa ngu dona. Dirigwi di to ya m’faya mbanza! Ene a to wa, e fa! Mbimo yi Vafilista va nga wona to a wite va to tutuma ve thava. Aku Dhavhidha i nga ti txifanyana a ti kotisile kutxani kuxula Goliya?— Nguko a nga vhunwa ngu Jehovha. Phela Jehovha a ni mtamo wa hombe kupala Goliya!

U gonda txani ka txikombiso txa Dhavhidha?— Jehovha a ni mtamo kupinda votshe. Ene i mngana wako. Se u txi thuka u thava, khumbula ti to Jehovha a na kuvhuna ti to u si thavi!