Ngakchia hna nan ṭih tikah zeidah nan tuah tawn?— Nulepa sinah bawmhnak nan hal tawn hna a si ko lo maw? Aan bawm khotu hna a dang pakhat a um rih. Amah cu a ṭhawng bikmi a si. Amah cu ahodah a si? Nan hngal maw?— Jehovah Pathian a si. Baibal chung i mi ralṭha a simi, mino David kong kha zoh hna u sih. Jehovah Pathian nih a ka bawmh peng lai ti kha a hngalh caah a ral a ṭha.

David cu a ngakchiat lio tein a nu le a pa nih Jehovah Pathian kha a dawt nakhnga an cawnpiak. Cuticun Jehovah Pathian cu a hawikom a hung si i a ka bawmh lai ti zong a hngalh. Cucaah David nih ṭih a nungmi thil a ton hmanhah a ṭih lo. Ni khat cu David nih tuu a cawngh lioah chiandeih nganpi pakhat nih a tuu kha a seh. David nih zeidah a tuah ti kha nan hngal maw? Zei hriamnam hmanh i ken loin chiandeih kha a rak thah. Cubantukin tuu seh awkah a rami vom zong kha a rak thah. David nih cutin a thah khawh hna nakhnga ahonihdah a bawmh?— Jehovah Pathian nih a bawmh.

Caan dang zongah David nih a ral a ṭhat kha a langhter. Mah cu Israel mi pawl Filistin mi hna he an i doh lioah a si. Filistin ralkap pakhat cu a khan zong a sang i a pum zong a ngan tukmi a si. A min cu Goliath a si. Mah mi nganpi nih Israel ralkap pawl le Jehovah Pathian kha a nihsawh hna. Israel ralkap pawl kha ‘keimah he doh a ngamhmi cu rak chuak u’ tiah a zuamcawh hna. Asinain ahohmanh nih an doh ngam lo. Mah kong kha David nih a theih tikah ‘keimah he kan i do lai. Jehovah Pathian nih a ka bawmh lai i kaan tei lai’ tiah Goliath kha a ti. David cu mi ralṭha a si ko lo maw?— Mah hnuah zeidah a cang ti kha hngalh nan duh ko lo maw?

David nih a lungherhchehnak le lung mil tete panga kha aa lak i mi nganpi he doh awkah a kal. Mi nganpi Goliath nih David cu a hmuh tikah a nihsawh. Asinain David nih hitin a ti: ‘Nangmah nih cun vainam he na ka rat hnawh nain kei nih cun Jehovah Pathian min in kan chuah hnawh.’ Cun a lungherhchehnak ah lung kha a hmanh i Goliath kha a cheh. Mah lung nih cun Goliath kha a calpadar bak ah a khen. Cuticun mi nganpi cu vawlei ah a  tlu i a thi. Filistin ralkap hna zong an ṭih tuk caah an zam dih. David nih mi nganpi Goliath kha aho bawmhnak thawngin dah a tei?— Jehovah Pathian nih a bawmh caah a si. Pathian cu mah mi nganpi nakin a ṭhawng deuh.

David sinin zei dahkan i cawn khawh?— Jehovah Pathian cu a ṭhawng bikmi a si. Cun kan Hawikom zong a si. Cucaah a hnuah nan ṭih ahcun Jehovah Pathian nih a kan bawmh khawh ti kha philhhlah u. Cuticun nan ṭih ti lai lo i nan ral a ṭha lai.