¿Chuqui maʼ mel cheʼ bʌ an a bʌqʼuen?... Tajol maʼ suben a papá o a mamá chaʼ an miʼ coltañet. Pero anto yambʌ muʼ bʌ mejlel i coltañet. Jiñʌch ñumen am bʌ i pʼʌtʌlel. ¿A wujil ba majqui?... Cheʼʌchi, jiñʌch Jehová. Tiʼ pejtelel ora miʼ mejlel a cʼajtiben chaʼan miʼ coltañet. Cheʼʌch tsiʼ mele David. Tiʼ wen taja i chʼejlel come tsiʼ xucʼchoco i pusicʼal ti Jehová. Yaʼ ti Biblia mi yʌl chaʼan David.

Cheʼ bʌ alʌ chʼiton to David, tsaʼ cʌntesʌnti i cʼuxbin Jehová. Jin chaʼan, maʼañic tiʼ chaʼle bʌqʼuen. Cabʌl chuqui tiʼ ñusa muʼ bʌ i bʌcʼñan yambʌlob. Yujil chaʼan Jehová jiñʌch yamigo muʼ bʌ mejlel i coltan. Jumpʼejl bʌ qʼuin, cheʼ bʌ David woli (yʌquel) i cʌntan i tiñʌmeʼ tac, ¡tsaʼ tili juncojt bajlum i tsiʼ chucu majlel juncojt i tiñʌmeʼ! ¿A wujil ba chuqui tsiʼ mele? Tiʼ yajñesa jiñi bajlum, tsiʼ chucu tiʼ tsuctiʼ i tiʼ tsʌnsa. Yicʼot jaʼel cheʼ bʌ juncojt oso tiʼ ñopo i cʼuxben i tiñʌmeʼ, David tiʼ tsʌnsa. ¿Majqui tsiʼ wen aqʼue i chʼejlel David?... Jiñʌch Jehová.

Laʼ laj qʼuel yambʌ bajcheʼ tiʼ pʌsʌ i chʼejlel David. Jiñʌch cheʼ bʌ jiñi israelob tsaʼ cajiyob ti guerra tiʼ contra jiñi filisteojob. Juntiquil filisteo wen chan bʌ yicʼot colem bʌ wiñic, i cʼabaʼ Goliat, tsiʼ wajle jiñi israelob yicʼot Jehová. Tsiʼ chʌn sube jiñi soldadojob: «¡Laʼ tilic majqui yom leto yicʼoton!». Pero maʼañic majqui tiʼ chʼujbibe come miʼ bʌcʼñañob. Cheʼ bʌ David tsiʼ yubi jiñi tsaʼ bʌ yʌlʌ Goliat, tsiʼ yʌlʌ: «¡Joñon mucʼʌch cac tilel baʼ añet! ¡Jehová mi caj i coltañon i mi cac mʌlbeñet!». ¿Tsaʼ ba i pʌsʌ i chʼejlel David maʼ wʌl?... Tsaʼʌch. ¿I chuqui tsaʼ ujti ti wiʼil?

David tsiʼ chʼʌmʌ i pʌrʌntun yicʼot tiʼ loto joʼpʼejl xajlel (tun), cheʼ jiñi tsaʼ majli i contrajin jiñi colem bʌ wiñic. Cheʼ bʌ Goliat tsiʼ qʼuele chaʼan David alʌ chʼiton jaxto, tsiʼ wajle. Cheʼ jiñi David tsiʼ yʌlʌ: «Talet tij contra yicʼot espada, pero talon ti a contra yicʼot i pʼʌtʌlel Jehová!». Cheʼ jiñi tsaʼ majli ti ajñel tiʼ tojlel Goliat. Tsiʼ yʌcʼʌ jumpʼejl xajlel tiʼ pʌrʌntun i tsiʼ julu. Toj tiʼ pam tsaʼ cʼoti jiñi xajlel, ¡i toj chʌmen tsaʼ yajli! Cheʼ bʌ jiñi filisteojob tsiʼ qʼueleyob jiñi tsaʼ bʌ ujti, tsaʼ cajiyob ti bʌqʼuen i tsaʼ putsʼiyob. ¡David tsiʼ mʌlbe (jotbe) jiñi Goliat cheʼ bʌ chʼiton to! ¿Chucoch maʼ wʌl?... Come Jehová tsiʼ colta  i jiñʌch ñumen pʼʌtʌl bʌ bajcheʼ yañoʼ bʌ, ¡anquese wen colemob!

¿Chuqui miʼ cʌntesañonla chaʼan David?... Chaʼan Jehová jiñʌch ñumen pʼʌtʌl bʌ bajcheʼ yambʌ wiñicob xʼixicob (quixtañujob). Jin chaʼan, mi an tajol muqʼuet ti bʌqʼuen, cʼajtesan: Jehová a wamigojʌch i jiñʌch muʼ bʌ mejlel yʌqʼueñet a chʼejlel.