Nje o yo̱kino̱ bola ke̱ o mabwa bo̱ngo̱ e?— Ponda po̱, o mala je̱ne̱ papa na mama ná bongwane̱ wa. Nde moto nupe̱pe̱ ena ongwane̱ wa. Nu moto e ngińa buka bato be̱se̱. O bi nja nu e?— E, e nde Yehova Loba. Di kwaleye te̱ ońola eso̱mbe̱ ewo̱ Bibe̱l e mabele̱no̱ ná David. A ta a bia ná Yehova a me̱nde̱ jongwane̱ mo̱ ponda ye̱se̱, ońola nika nde a si tano̱ a bwa bo̱ngo̱.

Ke̱ David a dia mwe̱nge̱ mwa muna, bayedi bao, nika ná sango na ńango, bokwe̱le̱ mo̱ o to̱ndo̱ Yehova. Nika ńongwane̱ David ná a si bwa bo̱ngo̱, to̱ ponda bema be mabwesane̱ bo̱ngo̱ be po̱ye̱no̱ mo̱. A ta a bia ná Yehova e Diko̱m lao, na ná Yehova a me̱nde̱ jongwane̱ mo̱. Buńa bō̱, ke̱ David e o tata mido̱ngi mao, ekokot’a ngila e po̱i, e damea mudo̱ngi mō̱ na mudumbu mwao, o pula da mo̱! O bi nje David a bolino̱ e? A bupe̱ nde ni ngila, na mo̱ a bwa mo̱, ponda po̱ na mā mao! Buńa bope̱pe̱, be̱r, nika ná ńama ńena ba mabele̱no̱ na fre̱nsi ná Ours, e po̱i damea mudo̱ngi mupe̱pe̱, na David a bwa ni be̱r. O mo̱nge̱le̱ ná nja ńongwane̱ David e?— E, Yehova nde ongwane̱ mo̱.

David a lee̱ pe̱te̱ ngiń’a mulema o mbad’a tobotobo buńa bō̱. Bonaisrael ba ta banane̱ tumba diwo̱ ba mabele̱no̱ ná Bonafilistia. Sonja po̱ ńa Bonafilistia e ta nde moto ńa mute̱ munde̱ne̱nde̱ne̱! Ba ta ba bele̱ mo̱ ná Goliat. Nu mot’a mute̱ munde̱ne̱ a ta a yo̱ye̱ sonj’a Israel, a yo̱ye̱ pe̱ Yehova. Goliat a bele̱ sonj’a Israel ná i ye o janane̱ mo̱. Nde bana ba Israel be̱se̱ ba ta ba bwa bo̱ngo̱ o jana. Ponda David a sengino̱ nika, a langwedi Goliat ná: ‘Na me̱nde̱ janane̱ wa! Yehova a me̱nde̱ jongwane̱ mba, na me̱nde̱ dipa wa!’ O mo̱nge̱le̱ ná David a ta ngiń’a mulema e?— E, a ta mo̱ jita. O mapula bia nje e tombi ombusa nika e?

David a no̱ngi ekoban ao, nika ná lambo ba mabolane̱no̱ o jangwa se̱nge̱, na mo̱ ala janane̱ nu mot’a mute̱ munde̱ne̱. Ponda Goliat e̱nno̱ ná David e nde eso̱mbe̱, na mo̱ a botea yo̱ye̱ mo̱. Nde David a langwedi mo̱ ná: ‘O mapo̱ janane̱ mba na po̱, nde mba na mapo̱ janane̱ wa na dina la Yehova!’ Na David a we̱le̱ se̱nge̱ o ekoban, angwea Goliat mo̱ o boso. Na se̱nge̱ e do̱mo̱ mo̱ o mbo̱mbo̱! Na nu mot’a mute̱ munde̱ne̱ a ko̱ o wase,  a wo̱! Bonafilistia ba ta ba bwa bo̱ngo̱ natē̱ ba ńa mīla. Ne̱ni eso̱mb’a moto ka David a we̱lino̱ dipa nu mot’a mute̱ munde̱ne̱ e?— Yehova ongwane̱ mo̱, Yehova a ta ngińa jita buka nu mot’a mute̱ munde̱ne̱!

Nje myango ma David meno̱ ná mokwe̱le̱ wa e?— Yehova e ngińa buka bato be̱se̱. E pe̱ nde Diko̱m lo̱ngo̱. Ponda nipe̱pe̱ o me̱nde̱no̱ so̱ bwa bo̱ngo̱, o si dimbea ná Yehova ena ongwane̱ wa ná o be̱ ngiń’a mulema!