Enyi a ɖi xɛsi ɔ, etɛ a ka nɔ wà?— Boya a nɔ hɔn yì m’máa towe kpo p’pa towe kpo gɔ́n bonu ye na d’alɔ we. Amɔ̌, mɛ ɖevo lɛ́ ɖè bo hɛn ɔ, é na d’alɔ we. É ɖó hlɔnhlɔn hú mɛ ɖevo ɖebǔ. A ka tuùn mɛ ɔ à?— Ɛɛn, Jehovah Mawu wɛ. Mǐ ni ɖɔ xó dó nyaví e nɔ nyí Davidi bɔ Biblu ɖɔ xó tɔn é wu. É tuùn ɖɔ Jehovah na d’alɔ emi hwebǐnu. Enɛ wu ɔ, é ɖi xɛsi ǎ.

Mɛjitɔ́ Davidi tɔn lɛ kplɔ́n ɛ sín hwenu e é ɖò kpɛví é, bɔ é yí wǎn nú Jehovah. Enɛ d’alɔ Davidi bɔ hwenu e nǔ e dó xɛsi lɛ é kpannukɔn ɛ é ɔ, ado hu i ǎ. É tuùn ɖɔ Jehovah wɛ nyí Xɔ́ntɔn emitɔn bo na d’alɔ emi. Davidi ɖò nukún kpé dó lɛngbɔ̌ ɖé lɛ wu wɛ gbè ɖokpo, bɔ kinnikinni ɖaxó ɖé wá sɔ́ ɖokpo! A ka tuùn nǔ e Davidi wà é à? É zun dó kinnikinni ɔ jí, bɔ é cí ɖɔ alɔ yayǎ kpowun wɛ é sɔ́ dó hu i na ɖɔhun! Bɔ hweɖevonu e lɔnmɔ ɖé wá lɛngbɔ̌ ɖé wlí gbé é ɔ, Davidi hu é lɔmɔ̌! Mɛ̌ ka d’alɔ Davidi, bɔ a lin?— Ɛɛn, Jehovah wɛ.

Hweɖevonu tíìn bɔ hwenɛnu wɛ Davidi ɖè akɔ́nkpinkpan xlɛ́ tawun. Izlayɛli-ví lɛ ɖò ahwan fun xá Filisitɛ́ɛn lɛ wɛ. Filisitɛ́ɛn lɛ sín ahwanfuntɔ́ ɖokpo tíìn bo ɖiga tawun, bo nyí mɛ jinganjingan ɖé! Goliyati wɛ é nɔ nyí. Nya jinganjingan enɛ nɔ ɖò tɛ́ hú nú ahwanfuntɔ́ Izlayɛli-ví lɛ tɔn kpo Jehovah kpo wɛ. Goliyati ɖɔ ɖɔ ahwanfuntɔ́ Izlayɛli-ví lɛ tɔn ɖě glá hǔn, é ni wá kpé hun xá emi. Amɔ̌, Izlayɛli-ví lɛ bǐ wɛ ɖi xɛsi. Ee Davidi sè mɔ̌ é ɔ, é ɖɔ nú Goliyati ɖɔ: ‘Un na kpé hun xá we! Jehovah na d’alɔ mì, bɔ un na ɖu ɖò jǐ towe!’ A lin ɖɔ Davidi kpankɔ́n à cé?— Ɛɛn, é kpankɔ́n tawun. A ka jló na tuùn nǔ e jɛ bɔ d’ewu é à?

Davidi sɔ́ klohwán tɔn bo fɔ kɛ́n e ɖíɖí é atɔ́ɔ́n, bo ɖidó hun kpé xá nya jinganjingan ɔ gbé. Ee Goliyati mɔ lee Davidi hwe sɔ é ɔ, é hu tɛ́ n’i. Amɔ̌, Davidi ɖɔ n’i ɖɔ: ‘A ja gɔ̌n ce kpo hwǐ kpo, loɔ, nyɛ ja gɔ̌n towe ɖò nyikɔ Jehovah tɔn mɛ!’ Enɛ gudo ɔ, é sɔ́ kɛ́n ɔ ɖokpo dó klohwán tɔn mɛ, bo kánwezun yì Goliyati nukɔn, lobo da dó è. Kɛ́n ɔ xò Goliyati dó nukɔn  gɛ́ngɛ́n jí! Nya jinganjingan enɛ j’ayǐ bo kú cúɖúɖú! Xɛsi ɖi Filisitɛ́ɛn lɛ kaka bɔ ye bǐ hɔn. Nɛ̌ Davidi vǔ enɛ ka kpéwú bo hu nya jinganjingan enɛ gbɔn?— Jehovah wɛ d’alɔ ɛ, Jehovah ɖó hlɔnhlɔn hú nya jinganjingan enɛ!

Etɛ tan Davidi tɔn ka sixu kplɔ́n we?— Jehovah ɖó hlɔnhlɔn hú mɛ ɖevo ɖebǔ. Xɔ́ntɔn towe wɛ é ka nyí. Enɛ wu ɔ, hweɖevonu e a na ɖi xɛsi é ɔ, flín ɖɔ Jehovah hɛn ɔ, é na d’alɔ we bɔ a na kpankɔ́n!