Ko honɗun waɗoton siɗon huli ? — No gasa on yahay ka neene mon maa ka baaben mon fii no ɓe wallira on. Kono no woodi goɗɗo goo walloowo on kadi. Himo ɓuri fow mbawdi. Hiɗon anndi ko hommbo ? — Ko goonga, ko Yahuwah Allaahu on. Jooni yewten fii suka innetenooɗo Dawda ka nder Deftere Allah. Himo anndunoo Yahuwah wallay mo saa’iiji ɗin fow, ko ɗun waɗi o hulataano.

Gila Dawda wonunoo paykun, mawɓe makko ɓen jannuno mo fii no o yiɗira Yahuwah. Ɗun walluno Dawda fii wota o hulu hay si o yi’ayno piiji hulɓiniiɗi. Himo anndunoo Yahuwah no yiɗi mo e o waawayno mo wallude. Ɲannde goo tawi Dawda no aynude baali, ngayuuri ari wippi baalii gootii. Hiɗon anndi ko honɗun Dawda waɗi ? O jokkituno ngayuuri ndin, o nanngi ndi o gerdi e mayri o wariri ndi juuɗe makko ɗen. Kadi, ɓayri saafaandu ari nanngugol baali ɗin, o waruno ndu ! Ko hommbo sikkuɗon walluno Dawda ? — Ko goonga, ko Yahuwah.

Saa’i goo aruno, Dawda holluno ngorngu makko ngun. Hari banii Isra’iila no haɓudude e yimɓe Filistii ɓen. Tawi goɗɗo e maɓɓe no toowi, himo dolni moƴƴa. Ko Jaaluuta o innetenoo. O gorko toowuɗo e dolnuɗo liggituno banii Isra’iila, o jali ɓe kamɓe e Yahuwah. Jaaluuta suusuno haa o noddi ɓe fii yo ɓe aru ɓe piirida e makko. Kono banii Isra’iila fow suusaano mo. Ɓayri Dawda nanii ɗun, o yeetii Jaaluuta : « Mi piiriday e ma ! Yahuwah wallay lan mi waawe ! » Hiɗon sikkude Dawda suusuno ? — Ko goonga, hari himo suusi moƴƴa. Hiɗon faalaa anndude ko feƴƴi ɓawto ɗun ?

Dawda ƴetti lampurawol makko ngol e kaaƴe newɗuɗe jowi, o yahi piiridugol e makko. Ɓayri Jaaluuta yi’ii Dawda, o fuɗɗi jalugol mo. Kono Dawda wi’i mo : « Hiɗa ardude e an e kaafa maa kan, kono min mi yaaray e maa e innde Yahuwah nden ! » Ontuma o ƴetti hayre o waɗi ka lampurawol makko, o dogiri telen  Jaaluuta, o lampii lampurawol makko ngol. Hayre nden yahi tappoyi Jaaluuta ka tummbo tiinde makko. O yani ka leydi o maayi. Yimɓe Filistiiɓe ɓen huluno haa ɓe dogi. Ko honno woniri oo suka innetenooɗo Dawda waawiri oo gorko dolnuɗo ? — Ko Yahuwah wallunoo mo ɓayri Yahuwah no ɓuri on gorko dolnude !

Ko honɗun jannguɗon e taariika Dawda on ? — Yahuwah no ɓuri fow dolnude. E himo yiɗi on. Ɲannde huluɗon woo, annditee Yahuwah wallitoto on fii no suusiron reedu !