Ò ólò labví láb naàvàẹ tṍó e pọ̀ síí nié?— Beà sẹlẹ, ò ólò sí ló o tẹ̀ nè o kà kọ bàá nveè nèè bá nee ni. Sõò, mèà íe dõòna nen eaẹ́ láá nvèè nà gé bá nè ni. Ẹlẹ íe kpóó èlmà kọ̀láá nen. É kọ olo nyímà ló nakà é není?— Ẽei, níà Jìhóvà Bàrì. Naà é ló sọ́l boo enè kà nvín ãa gbálà e bà kọ́ nu ea kilíé ló mm̀ Kpá Káí eaẹ̀ kọ̀là Dévìd. Ẹlẹ beè nyimá kọ Jìhóvà ḿ ólòó nveè nèè bá neèe, boo béè vó, pọ̀ náa beè sií e.

Lọ̀l gé tṍó e Dévìd beè di nù má a kà, ní a tẹ̀ nè a kà beè noòmae kọ á vùlè Jìhóvà ẹ. Níí beè nvèè bá nè Dévìd kọ á gá siiá pọ̀ bã̀àna tṍó e gbò gẹẹ gẹẹ ló dìtõ̀ò élaẹ́ sĩ́. Ẹlẹ beè nyimá kọ Jìhóvà dúè ńlẹ́ẹ̀ kóò vaá à ḿ nveè nèè bá neèe. À íe tṍó e Dévìd géè kùdẽé ló naanà ból, vaá enè kà gbele kà kpẹẹ̀ à gboó dù gé sii enè kà a naanàból. É kọ ò nyímà nu e Dévìd beè gboó naa? Ẹlẹẹ̀ kpenè ẹẹ kpẹẹ̀a vaá tú bábáẹ fẹẹmá! Dõòna tṍó e enè kà kpẽ́éńé beè gbĩ́ ge bà nàgé a naanàból, Dévìd fẹ́náe gé! Mée nie olo bulà kọ aẹ̀ nvèèbá nè Dévìd e?— Ẽei, aẹ̀ beè Jìhóvà.

À íe nagé dõòna tṍó e Dévìd beè lab nagé kpã̀àmà láb. Níà tṍó e pá Ízraẹ̀l géè bé pá bon Fìlístìà. Enè nen bé pá Fìlístìà beè aadeè bọọ́ gãboo vaá kpã̀àmà! A bée kọlà Gòláíà. Na kà kpã̀àmà gbálàí géè nvèèmà lẹ́ gbò bé pá Ízraẹ̀l nè Jìhóvà. Gòláíà beè ànà gbò bé pá Ízraẹ̀l kọ be bà dú kààà gbò bé, bàá dù gé beè ẹlẹ. Sõò pọ̀ beè sii dénè pá nvín Ízraẹ̀l ló gè bée. Tṍó e Dévìd dã́ belí, ẹlẹ à gboó kọ́ nè Gòláíà kọọ̀: ‘Nda ní n daẹ́ bé nié! Jìhóvà é nveè bá nèm, kọ ḿ bé ni èl bá!’ É kọ olo bulà kọ Dévìd beè kpã̀àmà gé?— Ẽei, aẹ̀ kpã̀àmà. É kọ olo gbĩ́ì ge nyimá nu ea kpáá naaá?

Tṍóá, Dévìd à gboó tú ńlẹ́ẹ̀ nkótib nè vòò súú dem vaá àà gé bé é ẹẹ kpã̀àmà nená. Tṍó e Gòláíà mon bé e Dévìd dú pánvín naà, à gboó nvèè mà lẹ́ Dévìd. Sõò, Dévìd kọ́ nèe kọọ̀: ‘Olo fáàlà gẹ̀bé nyòòmà nda, sõò nda túù boo béè Jìhóvà domá ní ló!’ Tṍóa, aẹ̀ gboó tú enè súú dem nvee dáà a ńkótib vaá  teelá kpee sĩ́ ló Gòláíà vaá vìg leléé ló. Súú demá à gboó mangã́é zẹ̀ẹ̀ dẽe! Ẹẹ kpã̀àmà gbálàa à gboó tooá mangã́ kẽ, vaa ù! Pọ̀ beè palà ge sii pá Fìlístìà naà níe bà téá zààlà. Aẹ náàà gbálà ń pánvín Dévìd à laá bé ẹẹ gbele kpã̀àmà gbálàí èlbá ẹ́?— Jìhóvà beè nvèè bá nèe, vaá Jìhóvà íe kpóó èlmà nakà kpã̀àmà gbálàá!

Éé ní olo é láá nó lọl ló nòòtẽ́ ea kil ló Dévìd e?— Jìhóvà íe kpóó èlmà kọ̀láá nen. Vaá ẹlẹẹ̀ ńlóò kóò. Be à íe tṍó e pọ̀ síí ni, kẽ̀èa boo kọ Jìhóvà é láá naa kọ ó ié a gẹ ló!