Ya ɲɔu lə ɓə ya gɛ ? — Ya li kiɛ ə́ lee da ə́ nan di pɔ di kpɔnmaa tɛɛ ə́ pɔ. Kɛlɛɛ nu takpɛli kaa nwɔnɔ laa yɛ pɛli kpɔnmaa tɛɛ ə́ pɔ. Vaɲa kɛnɛi dɛɛ nu lɔpee gəlee ɓa. Ə́ maa nui kɔlɔn ? — Ee, Zehova Yálá ɓə. Biblə kaa hulɔnon da hwaaɓoi diɛ kɛ ma Davidə, gu ɉulɔnon tii maa mɛni hukulaa kaa. Ə gɔlɔn gɛ yɛ Zehova kaa lɔ pai kɛi ma yɛ kpɔnmaa tɛɛ bɔ, yili ɓa ho kɛi ɲɔu.

Ɓɛlowai Davidə ə kɛ la a lokolo, gaa nua di galan Zehova wɛlilakɛ mɛni ɓa. Yili ə kpɔnmaa tɛɛ Davidə pɔ ho kɛi ɲɔu, ə ma kɛ mɛni maaɲɔuyɛɛ ta aa ɉɔlɔɓo. Ə kɛ a gɔlɔnŋaa yɛ Zehova kaa a məlan mun ə lɛɛ a pɛli kɛ ə kpɔnmaa tɛɛ bɔ. Holo ta, Davidə ə lɛɛ ɓəlaaɠaa maakpɛi, yala kɛnɛ ta ə pa ə da hon ! Ə́ gɔlɔn yii Davidə ə gɛ ? Ə hwilɛn ɲalai tii pulu, ə ɉon ə baa, ə baa kiɛ a ɲee ! Ə lɛɛ nwɔnɔ lɔwɔ huwɔ kɛnɛ ta ə məlaa ta hon, Davidə ə yili paa nwɔnɔ ! Ə́ wɔ kili ɓa gbɛɛ ɓə kpɔnmaa tɛɛ Davidə pɔ ? — Ee, Zehova ɓə kɛ.

Davidə ə liikpələ laa kɛ a lowai takpɛli. Isilayɛli lonnii di kɛi kɔ kɔ da lɔi ta hu nua yii di kɛi kɛ diɛ Filisitɛinɠaa. Filisitɛinɠaa tii di wɔ holahi tɔnɔn ə kɛ laa, yɛ ɓo a gɛnɛ, ɲee la muhəɠɛɛ ! Naa ɓaa kɛ Goliyatə. Nu yee la muhəɠɛɛ tii ə kɛi yɛlɛ kulɔ Isilayɛli lonnii di wɔ holahiɠaa hu, ə lɛɛ Zehova. Goliyatə ə hwaa tee Isilayɛli holahiɠaa diɛ. Isilayɛli lonnii kəlee di kɛi ɲɔu ma. Ɓɛlowai Davidə ə yili bələ mɛn na, ə mo Goliyatə ɓa yɛ ma : « Gwa yɛ́ gu kaa gɔi ! Zehova kaa kpɔnmaa tɛɛ bɔ ɲee ə tɛɛ yɛ́ ! » Ə́ wɔ kili ɓa Davidə ə liikpələ laa kɛ ? — Ee, ə liikpələ laa kɛ. Ə́ kaa bɔ ə́ gɔlɔn yii nwɔnɔ tɛɛ naa pulu ?

Davidə ə ŋɔ yələ vin həɠə ə bɛlɛ kwɛni lɔɔli ɓa, ə lɛɛ ə li Goliyatə pɔ hwaa kɛ mɛni ɓa. Kɛlɛɛ Goliyatə ə yɛlɛ Davidə ɓa, maahɔlɔɓo ə gaa yɛ yili kaa a hulɔnon ! Davidə ə mo ma yɛ ma : « Ə́ kaa pai bɔ a ɓowa kweaa, kɛlɛɛ nwɛi gáá pai ə́ pɔ a Zehova laa ! » Ə kwɛni tɔnɔn lɔ ŋɔ yələ vin hu, ə gilɛ həɠə yɛ lɛɠɛ Goliyatə ɓa, ə bili Goliyatə pɔ. Gwɛni ə Goliyatə hɔɔ dɔwɔla ! Nu yee la muhəɠɛɛ tii ə too a  bowa ! Filisitɛinɠaa di ɲɔu ə lɛɛ di kəlee di pu. Pələi ma Davidə ə kɛ la a hulɔnon, ɲee ə tɛɛ ləi nu yee la muhəɠɛɛ tii ɓa ? — Zehova ə kpɔnmaa tɛɛ bɔ, ə lɛɛ Zehova hwaŋa kɛnɛi kɛ dɛɛ nu yee la muhəɠɛɛ tii ɓa !

Kili ləkɛɛ ɓə ya pɛli ɉɔlɔɓoi Davidə maa mɛnii tii hu ? — Zehova hwaŋa kɛnɛi nu lɔpee gəlee ɓa. Ə lɛɛ gaa a ə́ ɓəlan mun. Yili ɓa holoi lɔpee ya ɲɔu la, ə́ kiliŋahiɛ yɛ́ ma Zehova a pɛli kpɔnmaa tɛɛ ə́ pɔ hwa ɲɔu !