¿Kasa paainjaka mmorüle pia?... Eeshi puchuntüle kaaliinwaa sümüin püi otta nümüin püshi. Akaisaʼa eein wanee Maleiwa pülashi maʼin eekai süpüla nükaaliinjüin pia. ¿Pütüjaa aaʼu kasaichin nünülia?... Jeʼwaa nünülia. Takuentajüinjatü paala pümüin nüchiki wanee jintüi kanüliakai David saashin tü Wiwüliakat. Nütüjaa aaʼu David nükaaliinjünüin waneepia nutuma Jeʼwaa. Makalaka meimmoluin nia.

Ekirajünüshi David joʼuuiwaʼaya nia nüchiki Jeʼwaa nutuma nüshi jee sutuma nii. Makalaka alin Jeʼwaa nüpüla otta meimmoluin nia. Jaʼitairü alatüin nümüin David wanee kasa eekai keemain maʼin, nütüjaa aaʼu nükaaliinjüneechin nutuma Jeʼwaa. Aleewashi maʼin nia nümaa Maleiwa. Soʼu wanee kaʼi, oʼunüshi David sünain arüleejaa anneerü. Nujuʼitaaka wanee wasashi miyoʼushaata süpüla niküinjatüin naʼanneetse David. Nuwataaka David nooʼomüin chi wasashikai süpüla nuʼutüin naaʼin. ¡Ouktüshi wasashikai! Shiasaʼa müin soʼu wanee kaʼi süchikijee tia, sujuʼitaaka wanee jeesü süpüla shiküinjatüin naʼanneetse David, nuʼutaka saaʼin tü jeesükat. ¿Pütüjaa aaʼu jaralin akaaliinjüin David?... Nia Jeʼwaa.

Shiasaʼa soʼu wanee kaʼi, alatüsü wanee kasa. Mmotsü wayuu süpüshuaʼa soʼu tia. Nia neʼe meimmoluinka David nümüiwaʼa. Soʼu kaʼikat tia, ashuteeshii na filisteokana naaʼu na israeliitakana. Eejachi wanee surulaat miyoʼushaata maʼin, Goliat nünülia. Nimeeʼerainpalashii na surulaat israeliitakana otta nimeeʼerainpalashi Jeʼwaa. Nujuyaajüin na israeliitakana süpüla natkaainjanain nümaa. Nnojoishi eein wanee israeliita ojuʼitaakai sünain atkawaa nümaa Goliat. Mmotshii napüshuaʼa. Naapapa David süchiki tia, nümaka nümüin Goliat: «Tayeechi piʼipoloko sünain atkawaa. Takanajeechi pia süka nükaaliinjeechin taya Jeʼwaa». Yalayala aaʼinchi David, ¿aashimüin?... Aa, yalayala aaʼinchi. ¿Pütüjaa aaʼu kasain alatüin süchikijee tia?

Nüneeküin David jaʼraisü ipa otta nükoyotka niʼipomüin Goliat. Niʼrapa Goliat jintülin David, nimeeʼerainpalaka nia. Nümakalaka David nümüin: «Ojuʼitaashi pia teʼipomüin sümaa chajaruuta, aluʼusaʼa  tayakai, ojuʼitaashi piʼipomüin saaʼu nünülia Jeʼwaa». Niʼitaakalaka David wanee ipa suluʼu junaayaka sümaa nuwataain niʼipomüin Goliat. ¡Tooj!, niʼipoʼunain Goliat, ouktaleeka nia. Neʼrapa na filisteokana ouktüin Goliat, eimmolojooshii sümaa napantajaain. ¿Jamüshi nükanajaka David wanee wayuu eekai miyoʼushaatain nuulia?... Shia süka nükaaliinjünüin nutuma Jeʼwaa. ¡Pülashi maʼin Jeʼwaa nuulia Goliat!

¿Kasa shikirajaka anain pia nukuwaʼipa David?... Pülashantashi maʼin Jeʼwaa suulia wayuu. Otta paʼaleewain nia. Eere wanee kasa mmotka eema pia, soto paaʼin nükaaliinjeechin pia Jeʼwaa süpüla meimmoluinjachin pia.