¿Mbaepa reyapo rekɨɨye yave?... Güɨramoi reeka nderu jare ndesɨ ndemborɨ vaerä. Oimevi kia ipuere ndemborɨ. Jaeko imbaepuere yae, mbaetɨ kia jae rami. ¿Reikuaa kiapa jae?... Jökoraiko, jaeko Jehová. Jekuae avei ndepuere reyerure ndemborɨ vaerä. Biblia imiari kuimbae taɨrusu vaere David jee vae, jae oikuaa Jehová omborɨta, jáeramo mbaetɨ okɨɨye.

David michi güive, tu reta omboe oaɨu vaerä Jehová. Jáeramo jae mbaetɨ okɨɨye. Yepetëi oasa mbae ïru reta omongɨɨye vae. Jae oikuaa Jehová ivɨa-ïruko omborɨta vae. Metei ara, David oyangareko oï ivecha retare yave, ¡ou yaguapope jare güɨraja metei vecha! ¿Reikuaapa mbae oyapo David? Oaɨkuemoña yaguapope, oipɨɨ jañɨkape jare oyuka. Jökorai oyapo oso ou yave oipɨɨ metei vecha, David oyukavi. David mbaetɨ okɨɨye ¿Kia pa omborɨ?... Ikaviko, Jehová omborɨ.

Yaechavi kërai David oechauka mbaetɨ okɨɨye. Israel iñemuña reta oñeraro oï yave filisteo reta ndive. Filisteo reta isundaro reta ipɨtepe ¡oïko metei ipuku yae, tuicha vae! Goliat jee vae. Goliat omboarasɨ sundaro Israel iñemuña reta jarevi Jehová. Osapúkai sundaro retape jei reve: “¡Kia outa oñeraro che ndive!”. Ërei opaete okɨɨye yae mbaetɨ oime kia oñeraro jae ndive. David oendu Goliat jei vae, jáeramo jei: “¡Che añerarota nde ndive! ¡Jehová chemborɨta romoamɨri vaerä!”. ¿Añetepa David jëia vae?... Jökorai, jaeko jëia yae vae. Jaɨkue rupi, ¿mbaepa oasa?

David oipɨɨ pandepo ïtasɨi raɨ, jare itamamboka, jare ojo oñeraro vaerä kuimbae ipuku yae ndive. Goliat oecha David yave, güɨroviaä etei omae jese; echa itaɨrusuasɨ yae. Jayave David jei chupe: “Nde reyu chekotɨ kɨsepuku ndive, ¡ërei che ayu ndeve Jehová jeere!”. Jayave David osɨi oporepeña kuimbae ipuku yae ikotɨ. Oñono ïta itamambokape jare oyapi filisteo jesɨvape; ¡jayave Goliat omano oa ɨvɨre! Jare filisteo reta oecha yave oasa vae, okɨɨye yae jare opa otekuarai  reta. ¿Këraira metei taɨrusu David rami ipuere omoamɨri kuae filisteo ipuku yae vae?... Jehová omborɨ, ¡jare jae imbaepuere yaeko jókuae sundaro ipuku yae vaegüi!

¿Mbaepa yayemboe David oyapogüere?... Jehová imbaepuere yae ete vae opaete ïru vae retagüi. Jáeramo, rekɨɨye yave, nemaendúa: Jehová ndevɨa-ïru ndemborɨta reiko vaerä taɨrusu jëia rami.