ADÀ 6
Davidi Ma Nọ Dibu
Etẹwẹ a nọ wà eyin budi we?— Vlavo a nọ họnyi papa kavi mama dè na yé nido gọalọna we. Amọ́, mẹdevo de tin he sọgan gọalọna we ga. Mẹlọ tindo huhlọn hugan mẹlẹpo. Be a yọ́n mẹlọ ya?— Mọwẹ, Jehovah wẹ. Gbọ mí ni dọhodo jọja de he Biblu ylọdọ Davidi ji. E yọnẹn dọ Jehovah ma na jo emi do gbede, enẹwutu e ma nọ dibu.
Sọn whenue Davidi gbẹ́ pò to pẹvi gbọ́n wẹ mẹjitọ etọn lẹ ko plọn ẹn nado yiwanna Jehovah. Ehe gọalọna Davidi ma nado nọ dibu to whenue nuhe tlẹ sọgan dobuna ẹn lẹ jọ do e go. E yọnẹn dọ Họntọn emitọn wẹ Jehovah yin, podọ Ewọ na gọalọna emi. To gbèdopo, Davidi to nukunpedo lẹngbọ lẹ go bọ kinnikinni daho de wá bo yí adú do wle lẹngbọ de! Be a yọ́n nuhe Davidi wà ya? E yàn kinnikinni lọ bo wle e bosọ hù i. Podọ to whenue gbekanlin devo he nọ yin beali wle lẹngbọ de, Davidi sọ hù i. Mẹnu wẹ gọalọna Davidi?— Mọwẹ, Jehovah wẹ.
Davidi sọ do adọgbigbo hia taun to nujijọ devo whenu. To whelọnu, Islaelivi lẹ to awhànfun sọta Filistinu lẹ. Dopo to awhànfuntọ Filistinu lẹ tọn mẹ yin asuka de, na e dite taun bosọ tli! Yinkọ etọn wẹ Goliati. Dawe ehe nọ to Islaelivi lẹ po Jehovah po kò. E nọ to ohó dín awhànfuntọ Islaeli tọn lẹ bo nọ dọna yé dọ yé ni wá hoavùn hẹ emi. Amọ́, Islaelivi lẹpo wẹ to budina dawe lọ badabada. To whenue Davidi sè ehe, e dọna Goliati dọmọ: ‘Yẹn na hoavùn hẹ we! Jehovah na gọalọna mi bọ n’na duto jiwe!’ Be a lẹndọ Davidi yin adọgbotọ ya?— Mọwẹ, adọgbotọ daho de wẹ ewọ yin. Be a jlo na yọ́n nuhe jọ bọdego ya?
Davidi ze akòtopẹ́ etọn, yèdọ kannakanna de he nọ yin yiyizan to hohowhenu po agán atọ́n po bo yì nado hoavùn hẹ Goliati. To whenue dawe asuka lọ mọdọ yọpọvu de wẹ Davidi yin, e kò e. Amọ́, Davidi dọna ẹn dọmọ: ‘Hiẹ ja dè e po ohí de po, amọ́ yẹn ja dè we to oyín Jehovah tọn mẹ!’ Enẹgodo, Davidi yí agán de do akòtopẹ́ etọn mẹ, bo dlí do Goliati ji bo de akòtopẹ́ lọ do e. Agán lọ jẹ nukọn-gángán ota Goliati tọn go. Dawe asuka lọ họ́ jẹ kọmẹ, bo kú! Obu jẹ Filistinu lẹ ji sọmọ bọ yemẹpo họ̀n. Mẹnu wẹ gọalọna Davidi he yin yọpọvu de nado duto dawe asuka lọ ji?— Jehovah wẹ gọalọna ẹn, podọ Jehovah tindo huhlọn hugan asuka enẹ!
Davidi ma dibu, na e yọnẹn dọ Jehovah na gọalọna emi
Etẹwẹ a sọgan plọn sọn otàn Davidi tọn mẹ?— Jehovah tindo huhlọn hugan mẹlẹpo. Podọ Họntọn towe wẹ ewọ yin. Enẹwutu, to whedevonu he obu na di we, flindọ Jehovah sọgan gọalọna we nado yin adọgbotọ!
