Bema oi gari dahaka oi karaia?—Reana emu sinana bona tamana edia heduru oi tahua. To oi do ia durua diba tauna ma ta ia noho danu. Iena siahu be bada herea. Oi diba unai tauna be daika, a?—Oibe, ia be Iehova Dirava. Mani Baibel ese ia herevalaia mero matamata ta ladana Davida ita herevalaia. Davida ia gari lasi badina ia diba Iehova ese hanaihanai do ia durua.

Davida ia beibi negana amo ena tama sina ese ia idia hadibaia Iehova ia lalokau henia totona. Unai ese Davida ia durua ia gari lasi totona, herevana ia dekenai hagaria gaudia haida idia vara. Ia diba Iehova be iena Turana bona ia do Ia durua. Nega ta, Davida be ena mamoe ia naria noho lalonai, laiona ta ia lao bona mamoe ta ia koria bona abia lao. Oi diba Davida be dahaka ia karaia, a? Ia be laiona ena murinai ia lao bona ena imana amo laiona ia alaia! Ma nega ta bea ta ia ura mamoe ia ania neganai, Davida ese unai bea ia alaia danu! Oi laloa daika ese Davida ia durua?—Oibe, Iehova ese ia durua.

Danu nega ma ta ai, Davida be aonega karana ta ia karaia. Israela taudia be Pilistia taudia idia tuari henidia noho. Pilistia taudia edia tuari tauna ta be lata herea! Iena ladana be Goliata. Ia ese Israela tuari taudia bona Iehova ia kirikirilaia. Ia ese Israela taudia ia doria ia do idia tuari henia totona. To Israela taudia ibounai be idia gari ia idia tuari henia totona. Davida be unai ia kamonai neganai, Goliata dekenai ia gwau: ‘Lau ese oi do lau tuari henia! Iehova ese lau do ia durua bona oi do lau halusia!’ Oi laloa Davida ia gari lasi, a?—Oibe, Davida ia gari lasi. Oi ura gabeai ia vara gauna oi diba, a?

Davida ese ena vilipopo bona nadi manadamanada faiv ia abia, bona ia lao Goliata ia tuari henia totona. Goliata ia itaia Davida be mero matamata ta sibona neganai, Davida ia kirikirilaia. To Davida ese ia hamaoroa: ‘Oi be mai emu kaia danu oi mai, to lau be Iehova ena ladana dekenai lau mai!’ Bena nadi ta be  ena vilipopo dekenai ia atoa, Goliata ia heau henia, bona ia dekenai nadi ia negea lao. Unai nadi ese Goliata ena baguna ia hodoa! Ia be tano dekenai ia moru diho bena ia mase! Pilistia taudia be idia gari dainai ibounai idia heau boio. Edena dala ai unai mero maragina Davida ese Goliata ia halusia diba?—Iehova ese ia durua, bona Iehova ena siahu ese Goliata ia hereaia!

Davida ena sivarai amo dahaka oi dibaia?— Iehova ena siahu be bada herea momokani. Ia be emu Turana. Unai dainai, bema gari mamina oi abia, oi laloatao Iehova ese oi do ia durua oi gari lasi totona!