LEKSION 6
Ari Naganassing Si David
Anni kuammu nu maganassikka?— Baka umeka kani inno anna ammomu tapenu mappoffun. Ngem egga paga i makoffun nikaw. Mas makapangngua yayya anne ta maski sinni. Ammum kari nu sinni yayya?— Wan. Si Jehova. Ammuatta ta Biblia i meyannung ta tadday nga abbing nga mangngagan tu David. Ammuna tu kanayun nga uffunan yayya ni Jehova, yari tu ari naganassing.
Mamegafu ta kabbing ni David, sinudduan ngana yayya na maganana nga ayatan si Jehova. Nakoffun yaw sa tapenu ari tu maganassing maski nu egga kananassing ira nga nesimmu sa. Kofunna gare si Jehova yari tu ammuna nga uffunanna yayya. Namittan, durante nga ipappastorna i karneru ira, tadday nga dakal nga leon i minay nangitammang tu karneru! Ammum kari nu anni kingngua ni David? Zinaddagna i leon anna pinatena nga lima na laman i neyusana! Turi ta egga tadday nga oso i umatake ta karneru, pinatay gapa ni David! Sinni ammum nga nanguffun kani David?— Wan, si Jehova.
Egga paga tanakuan nga tiempo nga kuruga magutu si David. Makigeggerra i Israelita kontra ta Filisteo. Tadday ta suddalu na Filisteo i sobra katannanna. Higante yayya! Goliat i ngaganna. Yaw nga higante iinsultuanna i Israelita nga suddalu pati si Jehova. Hinamun ni Goliat i Israelita nga suddalu tu labanadda yayya. Ngem naganassing ira nga makilaban sa. Turi ta naginna ni David yaw, kinagina kani Goliat: ‘Labanattaka! Uffunanna ni Jehova! Affutattaka!’ Para nikaw, magutu kari si David?— Wan, kuruga magutu. Ikayamu kari mammuan nu anni tumunug nga nesimmu?
Ina ni David i palsina anna i lima nga lilipo nga batu. Kabalinna minay yayya nakilaban ta higante. Turi ta nasingan ni Goliat si David nga mabbing paga, negala-galo na yayya. Ngem kinagi ni David sa: ‘Makilabakka niakan gukaban na espadam, ngem makilaban nga nikaw ta ngagan ni Jehova!’ Kabalinna, nipena i tadday nga batu ta palsina, nakkarela nga ziminafung kani Goliat anna pinalsina yayya. Nekanna i batu ta frente onu kiray ni Goliat! Natomba i higante. Natay ngana! Nakkakarela i Filisteo gafu ta naanassingan ira. Kunnasi naffu na mabbing nga si David i tadday nga higante?— Inuffunan yayya ni Jehova. Mas makapangngua si Jehova anne ta higante!
Ari naganassing si David gafu ta ammuna nga uffunan yayya ni Jehova
Anni magigiammum ta estoria ni David?— Mas makapangngua si Jehova anne ta maski sinni. Kofummu gapa yayya. Yari tu nu maganassikka uli, uffunannaka ni Jehova tapenu mabbalikka tu magutu!
