Ma ni hkrit ai shaloi hpa galaw ai kun?— Nu yan Wa kaw sa nna, karum hpyi na nre i? Raitim, ma ni hpe karum ya lu ai kaga marai langai naw nga ai. Shi gaw kaga masha ni hta na hpung atsam grau kaba ai. Shi gaw kadai rai na ta?— Yehowa Karai Kasang re. Chyum Laika kaw na Dawi ngu ai la sha a lam hpe hti yu ga. Dawi gaw Yehowa shi hpe galoi mung karum ya na hpe chye ai majaw, marai rawng ai re.

Dawi a kanu yan kawa gaw kaji ai aten kaw na, Yehowa hpe tsawra na matu sharin ya ai. Yehowa gaw shi a Jinghku byin wa nna, shi hpe karum ya na hpe kam ai. Dawi hkrit tsang na lam hkrum tim Yehowa hpe kam ai majaw n hkrit ai. Kalang mi hta Dawi sagu rem nga ai shaloi, hkanghkyi kaba gaw sagu langai hpe sa kawa ai. Dawi hpa galaw na ngu shadu ai kun? Shi hkanghkyi hpang hkan nna, hpa mung nlang ai sha, hkanghkyi hpe sat kau ai. Dai hpang sagu hpe rim sha na hkyen ai tsap langai hpe mung sat kau ai. Dawi hpe kadai karum ya ai kun?— Yehowa re.

Hpang kalang hta mung, Dawi gaw shi marai rawng ai hpe madun ai. Israela masha ni hte Hpilisti masha ni hpyen gasat ai aten hta re. Goliat ngu ai Hpilisti hpyenla langai gaw, grai galu kaba ai. Shi gaw Yehowa hte Israela hpyenla ni hpe, mani asawng ya ai. ‘Ngai hte gasat gwi ai ni pru wa mu’ nga nna Israela hpyenla ni hpe Goliat tsun ai. Raitim kadai mung shi hpe n gasat gwi ai. Dai lam hpe Dawi na ai shaloi ‘ngai nang hte gasat na. Yehowa ngai hpe karum ya ai majaw, nang hpe awng dang lu na re’ nga nna Goliat hpe tsun ai. Dawi gaw grai marai rawng ai nrai ni?— Matut nna hpa byin na hpe chye mayu ai i?

Dawi gaw shi a lakli hte, nlung manga hpe hta la nna, Goliat hte gasat na matu sa wa ai. Shi gaw Dawi hpe mu ai shaloi mani asawng ya ai. Raitim ‘Nang gaw ri nhtu hte ngai hpang de sa ai. Ngai chyawm gaw Yehowa a amying hte sa ai’ nga nna Dawi tsun ai. Dai hpang shi a lakli hta nlung bang nna Goliat hpe gap  dat ai. Nlung gaw Goliat a lahtan kaw hkra nna, ga ntsa galau si mat ai. Hpilisti masha ni yawng grai hkrit nna hprawng mat ma ai. Goliat hpe Dawi dang hkra kadai karum ya ai kun?— Yehowa karum ya ai re. Yehowa gaw dai grai galu kaba ai masha hta na atsam grau kaba ai.

Dawi kaw na anhte hpa hpe sharin la mai na ta?— Yehowa gaw yawng mayawng hta hpung atsam grau kaba ai. Shi gaw anhte a Jinghku mung re. Dai majaw hkrit ai myit rawng wa yang, Yehowa nang hpe, marai rawng hkra karum ya na hpe dum u.