Inki nge ke salaka kana nge me wa boma?— Mbala ya nkaka nge ke kwendaka na mama to na tata na nge. Kansi, kele ti muntu ya nkaka yina lenda sadisa nge. Yandi me luta bantu yonso na ngolo. Keti nge me zaba yandi?— Ee, yo kele Yehowa Nzambi. Bika beto tadila disolo ya Davidi, leke mosi ya bakala yina Biblia ke tubila. Yandi zabaka nde Yehowa ta sadisa yandi ntangu yonso, yo yina yandi vandaka ve kuwa boma.

Banda Davidi vandaka mwana-fioti, bibuti na yandi longaka yandi na kuzola Yehowa. Yo sadisaka Davidi na kuwa ve boma ata ntangu yandi kutanaka ti mambu ya nkaka ya boma. Yandi zabaka nde Yehowa vandaka nduku na yandi mpi nde yandi ta sadisa yandi. Kilumbu mosi, ntangu Davidi vandaka kukengila mameme, ntambu mosi ya nene kwisaka mpi kangaka dimeme! Keti nge me zaba diambu yina Davidi salaka? Yandi landaka ntambu yina mpi yo ke monana nde yandi fwaka yo na maboko! Mpi kilumbu ya nkaka ntangu urse kangaka dimeme, Davidi fwaka yo mpi! Nge ke yindula nde nani sadisaka Davidi?— Yo vandaka Yehowa.

Davidi salaka mpi diambu ya nkaka yina monisaka nde yandi vandaka kikesa mingi. Bantu ya Izraele vandaka kunwana ti Bafilistia. Mosi ya basoda ya Filistia vandaka muntu ya nda kibeni! Zina na yandi Goliati. Muntu yai ya nda vandaka kufinga basoda ya Izraele mpi Yehowa. Goliati tubaka nde soda ya Izraele yina kele ngolo kukwisa kunwana ti yandi. Kansi bantu yonso ya Izraele vandaka kuwa yandi boma. Ntangu Davidi waka diambu yai, yandi songaka Goliati nde: ‘Mono ta nwana ti nge! Yehowa ta sadisa mono, mpi mono ta bedisa nge!’ Nge ke yindula nde Davidi vandaka kikesa?— Ee, yandi vandaka kikesa kibeni. Keti nge ta zola kuzaba mambu yina salamaka na nima?

Davidi bakaka lanse na yandi ti matadi tanu, mpi kwendaka kunwana ti muntu yina ya nda. Ntangu Goliati monaka nde Davidi vandaka leke kibeni, yandi yantikaka kuseka Davidi. Kansi Davidi zabisaka yandi nde: ‘Nge ke kwisa kunwana ti mono na mbele ya bitumba, kansi mono ke kwisa na nge ti zina ya Yehowa!’ Na mbala mosi,  yandi tulaka ditadi na lanse na yandi, kwendaka ntinu na ntwala ya Goliati, mpi taka yandi yo. Ditadi bulaka yandi na mbunzu na kati-kati ya meso na yandi zole! Muntu yai ya nda bwaka na ntoto mpi fwaka! Bafilistia waka boma ngolo mpi bo yonso tinaka. Inki mutindu leke Davidi fwaka muntu yina ya nda?— Yehowa sadisaka yandi; Yehowa vandaka ngolo mingi kuluta muntu yina ya nda!

Inki dilongi nge lenda baka na disolo ya Davidi?— Yehowa kele ngolo mingi kuluta bantu yonso. Mpi yandi kele nduku na nge. Yo yina, kana nge kutana ti diambu mosi ya boma, kuvila ve nde Yehowa lenda sadisa nge na kuvanda kikesa!