Ngeenge wa tila, oho ningi ngahelipi?— Otashi dulika u lotokele kumeme woye ile kutate woye opo e ku kwafele. Ndele ope na omunhu umwe vali oo ta dulu yo oku ku kwafela. Oku na eenghono e dule ovanhu aveshe. Mbela ou shii kutya olyelye oo?— OJehova Kalunga. Natu kundafane kombinga yomumati umwe omunyasha oo a popiwa mOmbibeli. Edina laye oDavid. Okwa li e shii kutya Jehova ota dulu oku mu kwafela alushe nomolwaasho, ka li ha tila.

Ovadali vaDavid ova li ve mu honga a kale e hole Jehova okudja kounona waye. Osho osha li sha kwafela David aha kale e na oumbada nokuli nongeenge a shakeneka oinima itilifi. Okwa li e shii kutya Jehova oKaume kaye nokwa li e lineekela kutya ote ke mu kwafela. Efiku limwe, ofimbo David a li ta lifa eedi, okwa dja onghoshi inene ndele tai kwata po odi imwe. Mbela ou shii kutya David okwa li a ninga po shike? Okwa taataa onghoshi oyo ndele te i dipaa nomake aye mwene! Natango, eedi oda li da ponokelwa kemwangha, ndele nalo okwe li dipaa. Mbela ou shii kutya olyelye a li a kwafela David a dule okudipaa oilyani oyo?— Jehova oye a li e mu kwafela.

Efiku limwe vali, David okwa li a ulika kutya iha tila nandenande. Pomhito oyo, Ovaisrael ova li va ya va ka lwife ovanhu ovo haku tiwa Ovafilisti. Opa li omukwaita umwe Omufilisti oo a li omutongolume, sha hala okutya, okwa li mulemule! Edina laye oGoljat. Omutongolume oo okwa kala ta sheke ovakwaita Ovaisrael nosho yo Jehova. Goljat okwa kala ta shongo ovakwaita Ovaisrael ta ti nave uye ve mu lwife. Ndele Ovaisrael aveshe ova li va tila filufilu oku mu lwifa. Eshi David e shi uda, okwa lombwela Goljat a ti: ‘Ohandi uya ndi ku lwife! Jehova ota kwafele nge ndi ku finde!’ Mbela ito dimine kutya David ka li ha tila?— Oshoshili kutya David ka li ha tila nande. Mbela ou shii kutya oshike sha ka ningwa po?

David okwa kufa oshiumbifo noumanya vatano va fefengwa ndele ta i a ka lwife Goljat. Eshi Goljat a mona kutya David okamatyona nokuli, okwa hovela oku mu sheka. Ndele David okwa ti kuye: ‘Ove oto uya kwaame u na eongamukonda, ndele ame ohandi uya kwoove medina laJehova!’ Opo nee David okwa kufa okamanya ndele te ka tula moshiumbifo. Okwa lotoka a yuka kuGoljat ndele te mu umbu a shoneka. Okamanya oka denga Goljat mombaba yoshipala! Omutongolume oo  okwa fya nokwe lidenga pedu! Ovafilisti aveshe ova li va tila neenghono ndele tava faduka po. Oshike sha kwafela David oo a li okamatyona a finde omutongolume oo?— Jehova oye a li a kwafela David, molwaashi Jehova oku na eenghono dinenenene e dule omutongolume oo.

Oshike we lihonga mehokololo laDavid?— Jehova oku na eenghono e dule keshe umwe. Kakele kaasho, Jehova oKaume koye. Onghee hano, moshikando tashi landula ngeenge owa kala wa tila, dimbuluka kutya Jehova ota dulu oku ku kwafela uha kale wa tila.