6-ساباق
ٴداۋىت مۇلدەم قورىقپادى
سەن ٴبىر نارسەدەن قورىقساڭ، نە ىستەيسىڭ؟ ~ اتا-اناڭدى كومەككە شاقىراتىن شىعارسىڭ. ساعان كومەككە كەلەتىن تاعى بىرەۋ بار. ول ادامنان الدەقايدا كۇشتى. ونىڭ كىم ەكەنىن بىلەسىڭ بە؟ ~ ول — ەحوبا قۇداي. كەل، قازىر ٴداۋىت دەگەن جاس جىگىت جايىندا وقيىق. ول وزىنە ەحوبانىڭ ٵردايىم كومەكتەسەتىنىن بىلگەن، سوندىقتان ەش نارسەدەن قورىقپاعان.
اتا-اناسى داۋىتكە كىشكەنتايىنان ەحوبانى ٴسۇيۋدى ۇيرەتتى. وسىنىڭ ارقاسىندا ٴداۋىت ٴتىپتى قورقىنىشتى جاعدايدا دا باتىل بولدى. سەبەبى ول ەحوبانىڭ وزىنە دوس ەكەنىن جانە ونىڭ كومەككە كەلەتىنىن ٴبىلدى. بىردە ٴداۋىت قوي باعىپ جۇرگەندە، مالعا ۇلكەن ارىستان تاپ بەرىپ، ٴبىر قويدى الىپ كەتتى. سوندا ٴداۋىت نە ىستەدى ەكەن؟! ارىستاندى قۋىپ جەتىپ، ونى قۇر قولىمەن ٶلتىرىپ تاستادى. ال قويعا ايۋ تاپ بەرگەندە، ٴداۋىت ونى دا ٶلتىردى. داۋىتكە كىم كومەكتەستى ەكەن؟ ~ وعان كومەكتەسكەن — ەحوبا.
ٴداۋىت زور باتىلدىق تانىتقان تاعى ٴبىر وقيعا بولدى. يسرايلدىكتەر ٴفىلىستىر دەگەن حالىقپەن سوعىسىپ جاتتى. ولاردىڭ اراسىندا بويى وتە بيىك ٴداۋ سارباز بار ەدى. ونىڭ ەسىمى — عوليات. بۇل ٴداۋ سارباز يسرايل ساربازدارىن جانە ەحوبانى مازاق ەتتى. عوليات يسرايل ساربازدارىن وزىمەن شايقاسۋعا شاقىردى. ٴبىراق ەشكىمنىڭ وعان قارسى شىعۋعا باتىلى بارمادى. مۇنى ٴداۋىت ەستىگەندە، ول عولياتقا: «سەنىمەن مەن شايقاسامىن! ەحوبا ماعان كومەكتەسەدى، سوندىقتان مەن سەنى جەڭەمىن»،— دەدى. ٴداۋىتتى باتىل دەي الامىز با؟ ~ ٴيا، ول وتە باتىل بولدى. ارى قاراي نە بولدى ەكەن، كورەيىكشى.
ٴداۋىت تاس لاقتىراتىن ساقپان مەن بەس جۇمىر تاس الىپ، داۋگە قارسى شىقتى. عوليات ٴداۋىتتىڭ جاس ەكەنىن كورىپ، ونى كەلەكە ەتتى. سوندا ٴداۋىت وعان: «سەن ماعان قارسى سەمسەرمەن شىقساڭ، مەن ساعان ەحوبانىڭ اتىمەن شىقتىم!»— دەدى دە، ساقپانىنا ٴبىر تاس سالىپ، عولياتقا قاراي جۇگىرىپ، تاستى اتىپ جىبەردى. تاس عولياتتىڭ قاق ماڭدايىنا
ٴتيدى. ٴداۋ جەرگە قۇلاپ، مەرت بولدى. فىلىستىرلەر بولسا قورقىپ، قاشا جونەلدى. جاپ-جاس ٴداۋىت ٴداۋ ساربازدى قالاي جەڭدى؟ ~ وعان ەحوبا كومەكتەستى. سەبەبى ەحوبا داۋدەن الدەقايدا كۇشتى!ٴداۋىت ەحوبانىڭ كومەكتەسەتىنىن بىلگەندىكتەن، مۇلدەم قورىقپادى
ٴداۋىتتىڭ وقيعاسىنان نە نارسەگە ۇيرەندىڭ؟ ~ ەحوبا ادامنان الدەقايدا كۇشتى. ول — سەنىڭ دوسىڭ. ٴبىر نارسەدەن قورىققان كەزدە، ەحوبانىڭ ساعان باتىل بولۋعا كومەكتەسەتىنىن ۇمىتپا!