មេរៀនទី៦
ដាវីឌមិនភ័យខ្លាចទេ
ពេលកូនខ្លាច តើកូននឹងធ្វើអ្វី?— ប្រហែលជាកូនរត់ទៅរកប៉ាម៉ាក់ឲ្យជួយ។ ប៉ុន្ដែ មានបុគ្គលម្នាក់ទៀតដែលអាចជួយកូនបាន។ លោកជាបុគ្គលដែលខ្លាំងក្លាជាងគេទាំងអស់។ តើកូនដឹងថាលោកជាអ្នកណាទេ?— ពិតមែនហើយ គឺព្រះយេហូវ៉ា។ សូមយើងពិចារណាអំពីបុរសវ័យក្មេងម្នាក់ក្នុងគម្ពីរ។ គាត់ឈ្មោះដាវីឌ។ ដាវីឌបានដឹងថាព្រះយេហូវ៉ានឹងជួយគាត់ជានិច្ច ដូច្នេះគាត់មិនខ្លាចអ្នកណាទេ។
តាំងពីដាវីឌនៅក្មេងនៅឡើយ ឪពុកម្ដាយរបស់គាត់បានបង្រៀនគាត់ឲ្យស្រឡាញ់ព្រះយេហូវ៉ា។ នេះបានជួយដាវីឌមិនឲ្យភ័យខ្លាច ទោះជាគាត់ជួបអ្វីដែលគួរឲ្យខ្លាចក៏ដោយ។ គាត់បានដឹងថាព្រះយេហូវ៉ាជាមិត្ដសម្លាញ់របស់គាត់ ហើយលោកនឹងជួយគាត់។ មានម្ដងនោះ ដាវីឌកំពុងឃ្វាលចៀម ស្រាប់តែសត្វតោធំមួយបានមកហើយខាំពាំយកចៀមរបស់គាត់! តើដាវីឌបានធ្វើយ៉ាងណា? តើកូនដឹងទេ? គាត់ដេញតាមសត្វតោនោះ ចាប់ពុកមាត់វា ហើយសម្លាប់វាទៅ! ក្រោយមក ពេលសត្វខ្លាឃ្មុំចង់ចាប់សត្វចៀមរបស់គាត់ ដាវីឌក៏បានសម្លាប់ខ្លាឃ្មុំនោះដែរ! តើកូនគិតថាអ្នកណាបានជួយដាវីឌ?— ពិតមែនហើយ គឺព្រះយេហូវ៉ា។
មានពេលមួយទៀតដែលដាវីឌពិតជាក្លាហានណាស់។ ជនជាតិអ៊ីស្រាអែលត្រូវធ្វើសង្គ្រាមនឹងជនជាតិភីលីស្ទីន។ ទាហានម្នាក់របស់ជនជាតិភីលីស្ទីនមានកម្ពស់ខ្ពស់ជាងមនុស្សធម្មតាឆ្ងាយណាស់! គាត់ឈ្មោះកូលីយ៉ាត។ គាត់បានសើចចំអកដាក់ទាហានជនជាតិអ៊ីស្រាអែល និងមើលងាយព្រះយេហូវ៉ា។ គាត់ឲ្យជនជាតិអ៊ីស្រាអែលចាត់ទាហានមកប្រយុទ្ធនឹងគាត់។ ប៉ុន្ដែជនជាតិអ៊ីស្រាអែលទាំងអស់ខ្លាចមិនហ៊ានទៅប្រយុទ្ធនឹងកូលីយ៉ាតទេ។ ពេលដាវីឌឮអំពីរឿងនេះ គាត់បានប្រាប់កូលីយ៉ាតថា៖ ‹ខ្ញុំនឹងប្រយុទ្ធនឹងអ្នក! ព្រះយេហូវ៉ានឹងជួយខ្ញុំ ហើយខ្ញុំនឹងឈ្នះអ្នក!›។ តើកូនគិតថាដាវីឌមានចិត្ដក្លាហានទេ?— ពិតមែន គាត់ក្លាហានណាស់។ តើកូនដឹងទេថាមានរឿងអ្វីកើតឡើងក្រោយមក?
ដាវីឌបានយកខ្សែដង្ហក់និងថ្មរលីងៗប្រាំដុំ។ បន្ទាប់មក គាត់ចេញទៅប្រយុទ្ធនឹងកូលីយ៉ាត។ ខ្សែដង្ហក់គឺជារបស់ដែលប្រើសម្រាប់គ្រវីគប់ដុំថ្ម។ ពេលកូលីយ៉ាតឃើញដាវីឌនៅក្មេងដូច្នេះ គាត់បានសើចចំអកដាក់ដាវីឌ។ ប៉ុន្ដែ ដាវីឌបានប្រាប់កូលីយ៉ាតថា៖ ‹អ្នកបានមកប្រយុទ្ធនឹងខ្ញុំទាំងកាន់ដាវ តែខ្ញុំវិញ ខ្ញុំមកប្រយុទ្ធនឹងអ្នកដោយនូវនាមព្រះយេហូវ៉ា!›។ បន្ទាប់មក គាត់ដាក់ដុំថ្មមួយក្នុងខ្សែដង្ហក់ រត់ចូលទៅរកកូលីយ៉ាត ហើយគ្រវីគប់ដុំថ្មនោះតម្រង់ទៅរកកូលីយ៉ាត។ ដុំថ្មនោះត្រូវចំកណ្ដាលថ្ងាសរបស់គាត់ ហើយគាត់ដួលស្លាប់នៅនឹងដី! ជនជាតិភីលីស្ទីនភ័យខ្លាចណាស់ រហូតដល់ពួកគេរត់ទាំង
អស់គ្នា។ តើតាមរបៀបណាបុរសវ័យក្មេងដូចដាវីឌអាចយកឈ្នះកូលីយ៉ាត?— ព្រះយេហូវ៉ាបានជួយគាត់ ហើយលោកមានកម្លាំងខ្លាំងជាងកូលីយ៉ាតឆ្ងាយណាស់!ដាវីឌមិនភ័យខ្លាចទេ ដោយសារគាត់ដឹងថាព្រះយេហូវ៉ានឹងជួយគាត់
តើកូនអាចរៀនអ្វីពីគំរូរបស់ដាវីឌក្នុងរឿងនេះ?— ព្រះយេហូវ៉ាមានឫទ្ធានុភាពខ្លាំងជាងមនុស្សទាំងអស់។ ម្យ៉ាងទៀត លោកជាមិត្ដសម្លាញ់របស់កូន។ ដូច្នេះ ពេលកូនមានអារម្មណ៍ភ័យខ្លាច សូមចាំថា ព្រះយេហូវ៉ាអាចជួយកូនឲ្យមានចិត្ដក្លាហាន!