Чахе тӧ дьтьрси, тӧ чь дьки?~ Дьбәкә дьчи щәм де у баве хԝә, ԝәки әԝана али тә бькьн. Ле зани ԝәки хенщи де-баве тә диса кәсәк һәйә, йе кӧ дькарә али тә бькә. Әԝ жь һʹәмушка ԛәԝаттьр ә. Тӧ зани әв кʹи йә?~ Бәле, әв Йаһоԝа Хԝәде йә. Ԝәре әм ньһа дәрһәԛа хортәки хәбәр дьн. Дәрһәԛа ԝи дь Кʹьтеба Пирозда ньвисар ә. У наве ԝи Даԝьд ә. Даԝьд заньбу, ԝәки Йаһоԝа тʹьме ԝе али ԝи бькә, ләма жи әԝ нә дьтьрсийа.

Чахе Даԝьд һе зарʹ бу, де-баве ԝи әԝ һин дькьрьн, ԝәки Йаһоԝа һʹьз бькә. Әв йәк али Даԝьд дькьр кӧ әԝ нәтьрсә һәла һе ԝи чахи, гава һьнә тьштед хьраб жи дьһатьнә пешийа ԝи. Даԝьд заньбу кӧ Йаһоԝа досте ԝи бу, у ԝәки әԝ ԝе али ԝи бькьра. Щарәке чахе Даԝьд мьԛати пәзед хԝә бу, ньшкева шерәки мәзьн дәркʹәт у пәзәки ԝи гьрт! Ле тӧ зани Даԝьд чь кьр? Әԝи да пәй шер, у бь дәстед хԝә әԝ кӧшт! Щарәке жи, һʹьрчʹ пәза ԝи гьрт, ле Даԝьд әв һʹьрчʹ жи кӧшт! Ча тӧ дьшьрмиш дьби, кʹи али Даԝьд дькьр?~ Бәле, Йаһоԝа али ԝи дькьр.

Диса ԝәʹдәки ӧса һәбу, чахе Даԝьд мерхасийа хԝә да кʹьфше. Щьмәʹта Исрайели мьԛабьли щьмәʹта дьн дәрдькʹәт. Әв Фьльстийа бун. Йәк жь әскәред Фьльстийа гәләки бьльнд у тәрьки бу! Наве ԝи Голийатʹ бу. Голийатʹ ԛәрфе хԝә Исрайелийа у Йаһоԝа дькьр. Әԝи дьготә әскәред Исрайелийа, ԝәки дәркʹәвьн у тʹәви ԝи шәрʹ кьн. Тʹӧ кәс жь Исрайелийа нәверьбу тʹәви ԝи шәрʹ кьра, чьмки әԝана дьтьрсийан. Ле чахе Даԝьд дәрһәԛа ԝе йәке бьһист, әԝи готә Голийатʹ: ‹Әзе дәркʹәвьм тʹәви тә шәрʹ бькьм! Йаһоԝа ԝе али мьн бькә, у әзе тә алт кьм!› Ча тӧ дьшьрмиш дьби Даԝьд мерхас бу?~ Әре, Даԝьд гәләк мерхас бу. Дьхԝази пебьһʹәси паше чь ԛәԝьми?

Даԝьд пенщ кәвьред пәʹн у шьдан һьлда, у чу сәва кӧ тʹәви Голийатʹ шәрʹ бькә. Чахе Голийатʹ, Даԝьд дит, әԝ әʹщебмайи ма у дәстпекьр ԛәрфе хԝә ԝи бинә, чьмки Даԝьд һе гәләк щаһьл бу. Ле Даԝьд готә ԝи: ‹Тӧ тʹәви мьн пе шур у рʹьме хԝә дәркʹәти, ле әз бь наве Йаһоԝа дәрдькʹәвьм мьԛабьли тә!› Паше Даԝьд кәвьр дәрхьст, кьрә шьдана хԝә, бәрбь Голийатʹ рʹәви у әв кәвьр авитә ԝи. Әв кәвьр рʹаст ә-рʹаст анийа Голийатʹ кʹәт! Һьнге Голийатʹ әʹрде кʹәт у мьр! Чахе Фьльстийа әв йәк дитьн, әԝана һʹәмушк жь  тьрса рʹәвин. Гәло чаԝа Даԝьд карьбу Голийатʹе тәрьки алт кьра, нә әԝ һе гәләк щаһьл бу?~ Йаһоԝа али ԝи кьр. У Йаһоԝа жь ви Голийатʹе тәрьки жи, зәʹф ԛәԝаттьр бу!

Чь тӧ дькари жь мәсәла Даԝьд һин би?~ Йаһоԝа жь һʹәмушка ԛәԝаттьр ә. У әԝ досте тә йә. Һәрге ӧса бьԛәԝьмә кӧ тӧ бьтьрси, бькә бира хԝә ԝәки Йаһоԝа дькарә али тә бькә кӧ мерхас би!