Uba byepi inge waumvwa moyo?— Kampe unyemena kwi bainobe nangwa bashobe kuba’mba bakukwashe. Pano bino, kuji mukwabo wakonsha kukukwasha. Aye uji bingi na ngovu kukila bantu bonse. Abya wamuyuka uno ye tubena kwambapo nyi?— Ee, Yehoba Lesa. Twaya twisambe pa nsongwalume wanembwa mu Baibolo wa jizhina ja Davida. Davida wayukile kuba’mba kimye kyonse Yehoba wakonsha kumukwasha, onkao mambo, kechi waubanga moyo ne.

Kufumatu kimye Davida kyo ajinga mwanyike, bansemi banji bamufunjishe kutemwa Yehoba. Byo bamufunjishe byamukwashishe kubula kuba moyo kimye bintu bilengesha moyo kyo byamumwekejile. Wayukile kuba’mba Yehoba wajinga Mulunda nanji kabiji ne kuba’mba wakonsha kumukwasha. Kimye kimo Davida kyo afungilenga mikooko, bokwe mukatampe waishile wakwatapo mukooko umo. Abya wayuka byaubile Davida nyi? Davida waipayile uno bokwe. Nangwatu kimye mbeyala kyo akebelenga kukwata mikooko, Davida wamwipayile. Ubena kulanguluka’mba ñanyi wakwashishe Davida kuba bino?— Ee, wajinga Yehoba.

Kwajinga ne kimye kikwabo Davida kyo abujile kuba moyo. Bena Isalela bayilenga na kulwa na bena Filishitiya. Pa bashilikale bena Filishitiya pajinga umo walepele bingi, wajinga kitonzhi! Jizhina janji wajinga Goliata. Uno kitonzhi waubilenga mwenga bashilikale ba bena Isalela, kabiji ne kwendeleka Yehoba. Goliata wanununshishe bashilikale bena Isalela kuba’mba baye na kulwa nanji. Pano bino, bena Isalela bonse bachiine. Davida byo aumvwine bino, wabuujile Goliata amba: ‘Nsa kulwa nobe! Yehoba usakunkwasha, kabiji nsa kukushinda!’ Abya ubena kulanguluka’mba Davida kechi waubile moyo nenyi?— Ee, kechi waubile moyo ne. Ubena kukeba kuyuka kyamwekele nyi?

Davida wasendele malekenyi anji ne mabwe a nguzha 5, kabiji wayile na kulwa na uno kitonzhi. Goliata byo amwene’mba Davida mwanyiketu, watendekele kumwendeleka. Bino Davida wamwambijile’mba: ‘Obewa waiya kwi amiwa na mpoko; pakuba amiwa naiya kwi obewa mu jizhina ja Yehoba.’ Kepo Davida abikile jibwe mu malekenyi kabiji wayile kwipi ne Goliata ne kumwasa jibwe. Jino jibwe jamufikijile Goliata mu kilungi, kabiji uno kitonzhi waponene  panshi wafwa ne kufwa. Bena Filishitiya byo bamwene kino, baumvwine bingi moyo kabiji bonse banyemene. Ñanyi wakwashishe nsongwalume Davida kushinda kitonzhi?— Yehoba wamukwashishe, kabiji Yehoba wajinga bingi na ngovu kukila yewa kitonzhi.

Wakonsha kufunjilako ka ku jishimikila ja kwa Davida?— Yehoba uji bingi na ngovu kukila bantu bonse. Kabiji ye Mulunda nobe wa kine kine. Onkao mambo, inge wauba moyo, uvulukenga kuba’mba Yehoba wafwainwa kukukwasha kuchinchika.