Adieyi ovanganga avo wonga una wau?— Nanga kwa se ye ngudi aku okwendanga kimana batanina. Kansi, vena mpe ye muntu ankaka olenda kutanina. Osundidi wantu awonso nkuma. Nga ozeye kana nani i muntu ndioyo?— Elo, i Yave wa Nzambi. Yambula twavovela toko dimosi diyikwanga muna Nkand’a Nzambi dina ye nkumbu Davidi. Wazayanga wo vo Yave okuntanina. Muna kuma kiaki, kakalanga ye wonga ko.

Tuka muna kinsedia, mase ma Davidi banlonga o zola Yave. Ediadi diasadisa Davidi mu lembi mona wonga kana nkutu vava kawanananga ye mambu malenda kumwesa wonga. Wazaya wo vo Yave Nkundi andi, wadi kunsadisa. Lumbu kimosi, vava Davidi kavungulanga mameme, vayiza nkosi mosi yampwena yo baka ememe muna nu’andi. Nga ozeye dina Davidi kavanga? Walanda e nkosi yo kumvondela muna moko. I bosi, vava e use yabaka e meme, Davidi wavonda yo mpe. Nani obenze wasadisa Davidi?— Elo, Yave wansadisa.

Vakala ye ntangwa ina Davidi kasonga kikilu unkabu. Aneyisaele banwananga ye nkangu a Felesetia. Mosi muna makesa ma Afelesetia wandá ye bamba-ngolo kakala. E nkumbu andi Ngoleyate. E bamba-ngolo diadi wavezanga makesa ma Aneyisaele kumosi yo Yave. Ngoleyate wavovesa makesa ma Aneyisaele vo banwana yandi. Kansi, Aneyisaele wonga bakala wau wa kunwanisa. Vava Davidi kawa wo, wavovesa Ngoleyate vo: ‘Mono inwana yaku! Yave okunsadisa ye sunda ikusunda!’ Nga obenze vo Davidi unkabu kasonga?— Elo, unkabu kikilu kasonga. Nga ozolele zaya dina diavangama kuna kwalanda?

Davidi wabonga o nsing’andi ye matadi tanu yo kwenda nwana ye bamba-ngolo. Vava Ngoleyate kamona vo Davidi nleke kakala, wayantika kunseva. Kansi, Davidi wamvovesa vo: ‘Ongeye okungizila yo nsosolo, kansi omono ngizidi kwa ngeye muna nkumbu a Yave!’ I bosi, wasia etadi muna nsing’andi yo zaula kuna  kwakala Ngoleyate yo kunonga dio ye ngolo zawonso. Etadi diawandama vana lose lwa Ngoleyate. E bamba-ngolo wabwa vana ntoto yo fwa. Afelesetia bamona wonga yo tina. Nani wasadisa nleke nze Davidi mu vonda bamba-ngolo diadina?— Yave wansadisa. Yave wasunda e bamba-ngolo diadina o nkuma.

Adieyi olenda longoka muna lusansu lwa Davidi?— Yave osundidi wantu awonso o nkuma. Oyandi nkundi aku. Muna kuma kiaki, avo omwene wonga, sungamena vo Yave olenda kusadisa mu kala yo unkabu.