Ino ulacita buyani na waloonda?— Ndabona ulaya kuli banyoko nabi baiso ayi bakucafwe. Ono nkwali aumwi weenga wakucafwa. Ulicite nkusu kwiinda muntu uli woonse. Sa ulimushi?— Ee, ngu Yehova Lesa. Atwaambe pamwanike Defedi, waambwa muBaibo. Wakalinga kucishi ayi Yehova ananoomucafwa lyoonse, aboobo taakwe kuloondaawo.

Kuswabo kaali mwanike, bashali bakwe Defedi bakamuyiisha kusuna Yehova. Ici cakacafwa Defedi kutaloonda nabi shintu shiloondesha shamucitikila. Wakalinga kucishi kwaamba ayi Yehova ngushicibusa wakwe alimwi inga wamucafwa. Bumwi bushiku Defedi ndyaakalinga kweembela mbelele, nkalamu inene yakesa yacata mbelele! Sa ulicishi Defedi ncakacita? Wakakonkela nkalamu akwilwana kushikila waicaya amaansabo! Alimwi cinyama ciitwa ayi Beya ndyecakacata mbelele Defedi wakacicaya! Ino utooyeeya ayi ngani wakacafwa Defedi?— Ee, wakalinga ngu Yehova.

Kwakalinga ciindi acimwi ico Defedi ndyatakwe kuba aboowa. Bene Isilaeli bakalinga kulwana abene Filisiti. Mushilumamba womwi wabene Filisiti wakalinga mulaamfu alimwi ushimpite abuumbi! Liina lyakwe wakalinga ngu Golyati. Mushilumamba uyu wakalinga kunyaansha bashilumamba ba bene Isilaeli aYehova. Golyati wakaambila bashilumamba ba bene Isilaeli ayi bese bamulwane. Ono bene Isilaeli boonse bakamuloonda. Defedi ndyaakanyumfwa maswi aya, wakaambila Golyati ayi: ‘Nebo ntookulwana! Yehova utooncafwa, alimwi ntokukoma!’ Sa utooyeeya ayi Defedi taakalinga kucite boowa?— Ee,taakalinga kuciteewo. Sa ulisuni kushiba cakesa mukucitika?

Defedi wakabwesa cipaya cakuwalisha mabwe amabwe ali osanwe, akuya mukulwana shilumamba ushimpite uyo. Golyati ndyaakalanga akucana ayi Defedi ngumwanike, wakamunyansha. Sombi Defedi wakamwaambila ayi: ‘Webo utoosa mukundwana amupeeni, ono nebo ntookulwana muliina lyakwe Yehova!’ Lyalo wakabika libwe mucipaya cakuwalishaako, wakacicila kuli Golyati, akulifupwita kuli nguwe. Libwe lyakooma Golyati  pankumo! Golyati wakawa panshi, akufwa! Bene Filisiti bakaloonda cakwaamba ayi boonse bakacica. Ino Defedi mwanike wakacikonsha buyani kukoma shilumamba uyu mushimpite?—Mukwiinga Yehova ulicite nkusu kwiindaawo, wakamucafwa Defedi!

Ino inga weeya nshi kulikani lyakwe Defedi?— Yehova ulicite nkusu kwiinda muntu uli woonse. Alimwi ngu shicibusa wako. Aboobo ciindi cili coonse na waloonda, unokwibaluka ayi Yehova inga wakucafwa kutaba aboowa!