ບົດຮຽນ 6
ດາວິດມີຄວາມກ້າຫານຫຼາຍ
ເມື່ອຮູ້ສຶກຢ້ານລູກເຮັດແນວໃດ?— ລູກອາດຈະແລ່ນໄປຂໍໃຫ້ພໍ່ຫຼືແມ່ຊ່ວຍ. ແຕ່ຍັງມີອີກຜູ້ໜຶ່ງທີ່ສາມາດຊ່ວຍລູກໄດ້ຄືກັນ. ຜູ້ນັ້ນມີລິດເດດຫຼາຍກວ່າຄົນອື່ນໆ. ລູກຮູ້ບໍວ່າແມ່ນໃຜ?— ແມ່ນແລ້ວ ຜູ້ນັ້ນແມ່ນພະເຢໂຫວາພະເຈົ້າ. ໃຫ້ເຮົາມາເບິ່ງເລື່ອງຂອງຊາຍໜຸ່ມຄົນໜຶ່ງທີ່ມີຢູ່ໃນຄຳພີໄບເບິນ ລາວມີຊື່ວ່າດາວິດ. ລາວຮູ້ວ່າພະເຢໂຫວາຈະຊ່ວຍລາວສະເໝີ ລາວຈຶ່ງບໍ່ຢ້ານ.
ຕັ້ງແຕ່ດາວິດຍັງນ້ອຍໆ ພໍ່ແມ່ໄດ້ສອນລາວໃຫ້ຮັກພະເຢໂຫວາ. ສິ່ງນີ້ໄດ້ຊ່ວຍດາວິດໃຫ້ມີຄວາມກ້າຫານ ເຖິງແມ່ນວ່າຈະພົບກັບສິ່ງທີ່ເຮັດໃຫ້ຢ້ານກໍຕາມ. ລາວຮູ້ວ່າພະເຢໂຫວາເປັນໝູ່ຂອງລາວແລະພະອົງຈະຊ່ວຍລາວ. ມີຢູ່ເທື່ອໜຶ່ງ ຕອນທີ່ດາວິດກຳລັງລ້ຽງແກະຢູ່ ໄດ້ມີສິງໂຕໃຫຍ່ໆມາຄາບເອົາແກະໄປໂຕໜຶ່ງ! ລູກຮູ້ບໍວ່າດາວິດໄດ້ເຮັດແນວໃດ? ລາວໄດ້ໄລ່ຕິດຕາມສິງໂຕນັ້ນໄປແລະໄດ້ຂ້າມັນດ້ວຍສອງມືເປົ່າໆ! ແລະມີອີກເທື່ອໜຶ່ງ ມີໂຕໝີມາທຳຮ້າຍແກະ ແລະດາວິດກໍໄດ້ຂ້າມັນຄືກັນ! ລູກຄິດວ່າໃຜຊ່ວຍດາວິດ?— ແມ່ນແລ້ວ ພະເຢໂຫວາເປັນຜູ້ຊ່ວຍລາວ.
ມີອີກຄັ້ງໜຶ່ງທີ່ດາວິດກ້າຫານເປັນພິເສດ. ຕອນທີ່ຊາວອິດສະລາແອນພວມຕໍ່ສູ້ກັບພວກຟີລີດຕີນ. ທະຫານຄົນໜຶ່ງຂອງພວກຟີລີດຕີນໂຕໃຫຍ່ໆສູງໆຄືຍັກ! ຄົນນີ້ຊື່ວ່າໂຄລີອາດ ເຊິ່ງໄດ້ເວົ້າເຍາະເຍີ້ຍພະເຢໂຫວາແລະທະຫານຊາວອິດສະລາແອນ. ໂຄລີອາດໄດ້ທ້າໃຫ້ພວກທະຫານຊາວອິດສະລາແອນມາຕໍ່ສູ້ນຳ. ແຕ່ທະຫານທຸກຄົນຮູ້ສຶກຢ້ານຫຼາຍຈຶ່ງບໍ່ກ້າມາສູ້ກັບຄົນຮ່າງຍັກນັ້ນ. ເມື່ອດາວິດໄດ້ຍິນແນວນັ້ນ ລາວຈຶ່ງບອກໂຄລີອາດວ່າ: ‘ຂ້ອຍຈະໄປສູ້ກັບເຈົ້າ! ພະເຢໂຫວາຈະຊ່ວຍຂ້ອຍ ແລະຂ້ອຍຈະເອົາຊະນະເຈົ້າຢ່າງແນ່ນອນ!’ ລູກຄິດວ່າດາວິດເປັນຄົນກ້າຫານບໍ?— ແມ່ນ ລາວກ້າຫານຫຼາຍ. ລູກຢາກຮູ້ບໍວ່າຕໍ່ໄປເລື່ອງຈະເປັນແນວໃດ?
ດາວິດໄດ້ໄປສູ້ກັບຄົນຮ່າງຍັກນັ້ນແລະໃຊ້ພຽງຖ່ວງກັບຫີນກ້ຽງໆຫ້າກ້ອນເທົ່ານັ້ນ. ເມື່ອໂຄລີອາດເຫັນດາວິດຜູ້ໜຸ່ມນ້ອຍນັ້ນ ລາວກໍຫົວຂວັນໃສ່! ແຕ່ດາວິດບອກວ່າ ‘ເຈົ້າຖືດາບມາຕໍ່ສູ້ຂ້ອຍ ແຕ່ຝ່າຍຂ້ອຍ ຂ້ອຍມາຕໍ່ສູ້ເຈົ້າໃນນາມຊື່ພະເຢໂຫວາ!’ ຈາກນັ້ນດາວິດກໍເອົາກ້ອນຫີນໃສ່ໃນຖ່ວງ ແລ້ວແລ່ນເຂົ້າຫາໂຄລີອາດແລະຄວ່າງຫີນກ້ອນນັ້ນເຂົ້າໃສ່ຄົນນັ້ນ. ຫີນນັ້ນໄປຖືກຫວ່າງກາງໜ້າຜາກຂອງຄົນຮ່າງຍັກນັ້ນພໍດີ ແລ້ວກໍລົ້ມຟາດລົງດິນ ແລະຕາຍ! ພວກຟີລີດຕີນຢ້ານຫຼາຍຈຶ່ງພາກັນແຕກໜີໝົດ. ຄົນໜຸ່ມນ້ອຍຄືດາວິດເອົາຊະນະຄົນຮ່າງຍັກນັ້ນໄດ້ແນວໃດ?— ກໍຍ້ອນວ່າພະເຢໂຫວາໄດ້ຊ່ວຍລາວແລະພະອົງມີພະລັງຫຼາຍກວ່າຄົນຮ່າງຍັກນັ້ນຫຼາຍຕໍ່ຫຼາຍເທົ່າ!
ດາວິດມີຄວາມກ້າຫານຫຼາຍ ເພາະລາວຮູ້ວ່າພະເຢໂຫວາຈະຊ່ວຍລາວ
ເລື່ອງຂອງດາວິດສອນບົດຮຽນຫຍັງແກ່ລູກ?— ເລື່ອງນີ້ສອນວ່າ ພະເຢໂຫວາມີລິດເດດຫຼາຍທີ່ສຸດ ແລະພະອົງກໍເປັນໝູ່ຂອງລູກ. ດັ່ງນັ້ນ ເທື່ອໜ້າຖ້າລູກຮູ້ສຶກຢ້ານ ກໍຢ່າລືມວ່າພະເຢໂຫວາສາມາດຊ່ວຍລູກໃຫ້ມີຄວາມກ້າຫານໄດ້ຢ່າງແນ່ນອນ!
