Welaña ñahi neyi wunatiyi woma?— Hadaha watemukilaña kudi atata yeyi hela amama yeyi kulonda akukwashi. Ilaña kudi muntu mukwawu wunateli kukukwasha. Wukweti ñovu chikupu kubadika muntu wudi wejima. Wunamwiluki iwu muntu?— Diyi Yehova Nzambi. Tudizenu hadi kansi weyala Davidi ashimunawu muBayibolu. Welukili nindi Yehova wukumukwashaña mpinji yejima, dichi hatiyileña womaku.

Kufuma tuhu hampinji yadiña Davidi nkemba, anvwali jindi amudizishili kukeña Yehova. Chumichi chamukwashili Davidi kubula kwikala nawoma hela chakwila wamweneña yuma yakala. Welukili nindi Yehova Hibwambu dindi nawa wukumukwasha. Ifuku dimu, chayiliyi Davidi nakubiña nyikoku, mutupa weneni wenjili nakukwatahu mukoku wumu nakanwa kindi. Wuneluki chuma cheliliyi Davidi? Wamuhañili mutupa nawa wamujahili namakasa. Chimwahitili mpinji bera neyi wakwatilihu mukoku, Davidi wamujahili niyena. Wunatoñojoki neyi hinyi wamukwashili Davidi?— Yehova diyi.

Kudi mpinji yikwawu cheñi yamwekesheliyi Davidi kuhamuka. A Isarela azuñileña njita nawantu atenañawu nawu aFwilistinu. Mushidika wumu kaFwilistinu wadiña iyala wamulehi nankashi, wataluka. Ijina dindi diyi Goliyati. Iwu iyala wasweja kutaluka wasupishileña amashidika awaIsarela niYehova. Goliyati waswidikijileña amashidika awaIsarela kulonda azuñi nindi. Ilaña aIsarela ejima atiyileña woma wakuzuña nindi. Davidi chatiyiliyi iyi nsañu, wamulejeli Goliyati nindi: ‘Inakwinza tuzuñi. Yehova wukunkwasha nawa nukukujaha.’ Wunatoñojoki neyi Davidi wadiña wahamuka?— Eña, wadiña wahamuka. Wunakukeña kwiluka chuma chamwekeni cheñi?

Davidi wanoneli malekenyi nimalola atanu asenena, wayili nakuzuña naniwu iyala wasweja kutaluka. Goliyati chamumweniyi Davidi nindi hikansi, watachikili kumusupisha. Ilaña Davidi wamulejeli nindi: ‘Eyi wunenzi kudami nampoku yakabali, ilaña ami inakwinza mwijina daYehova.’ Washili ilola mumalekenyi, hakuya  lufuchi kudi Goliyati, nawa wamwasili. Ilola damushikeneni Goliyati hela disu iku disu iku. Iwu iyala wasweja kutaluka wadimbukili nawa wafwili. A Fwilistinu atiyili woma nawa atemukili. Indi iwu kansi Davidi watwesheli ñahi kushinda iwu iyala waswejeli kutaluka?— Yehova wamukwashili muloña Yehova wekala nañovu nankashi kubadika ona iyala waswejeli kutaluka.

Chumanyi chiwukudizila kumpanji yaDavidi?— Yehova wukweti ñovu nankashi kubadika muntu wudi wejima. Nawa Hibwambu deyi. Dichi neyi wunatiyi woma, watela kwanuka neyi Yehova wukukwasha kulonda wikali wahamuka.