SOMO MAR 6
Daudi ne Ok Oluor
Itimoga ang’o sama iluor?— Nyalo bedo ni idhiga ir mamau kata babau. Kata kamano, nitie ng’at machielo ma bende nyalo konyi. En gi teko moloyo ng’at ang’ata. Be ing’eyo ni en ng’a?— En Jehova Nyasaye. We wawuo ane e wi wuowi moro e Muma miluongo ni Daudi. Ne en gadier ni kinde duto Jehova ne dhi konye, omiyo ne ok oluor.
Jonyuol Daudi nochako puonje hero Jehova ka pod en nyathi. Mano ne okonyo Daudi kik obed maluor kata e kinde ma ne nitie gik ma ne nyalo bwoge. Ne ong’eyo ni Jehova ne en osiepne kendo Jehova ne dhi konye. Chieng’ moro kane Daudi kwayo rombe, sibuor moro maduong’ nobiro momako nyarombo moro! Be ing’eyo gima ne Daudi otimo? Ne olawo sibuorno kendo nenore ni ne onege mana gi lwete nono! Chieng’ machielo kane dubu omonjo rombene, Daudi nonego dubuno bende! Iparo ni ng’ano ma ne okonyo Daudi?— Ne en Jehova.
Nitie kinde machielo bende ma Daudi ne onyisoe chir makende. Jo-Israel ne kedo gi oganda moro ma ne iluongo ni Jo-Filisti. Achiel kuom jolwenj Jo-Filistigo ne en ng’at ma rabora nyowuoyo kendo ma rabet. Ne iluonge ni Goliath. Goliath ne jaro jolweny mag Jo-Israel kaachiel gi Jehova Nyasachgi. Ne othiano ne jolweny mag Jo-Israel ni gitemie kedo kode. Kata kamano, Jo-Israel duto ne oluore. Kane Daudi owinjo wachno, ne onyiso Goliath niya: ‘Abiro kedo kodi! Jehova biro konya kendo abiro negi!’ Donge Daudi ne en jachir?— Ee, ne en jachir ahinya. Be diher ng’eyo gima ne otimore bang’ mano?
Daudi ne okawo orujrene gi kite abich ma poth, kae to nodhi kedo gi rabetno. Kane Goliath oneno kaka Daudi ne en mana rawera matin, ne ojare. Kata kamano, Daudi nonyise niya: ‘Ibiro ira gi ligangla, an to abiro iri e nying Jehova!’ Kae to Daudi ne oketo kidi achiel e orujre moringo kochiko kama Goliath ne nitie mobayo kidino kochomo Goliath tir. Kidino ne ogoyo pat wang’ Goliath e kind wengene ariyo! Rabetno ne opodho piny mi otho! Jo-Filisti ne obwok ahinya ma giringo giduto. Ere kaka rawera matin kaka Daudi ne nyalo nego ng’at ma rabet kaka Goliath?— Jehova ne okonye, nimar Jehova ne nigi teko mang’eny moloyo rabetno!
Daudi ne ok oluor nikech nong’eyo ni Jehova biro konye
Ang’o ma inyalo puonjori kuom sigand Daudi?— Jehova nigi teko mang’eny moloyo ng’at moro amora. E wi mano, Jehova en osiepni. Omiyo, ka luoro omaki chieng’ moro, ng’e ni Jehova nyalo konyi bedo jachir!
