XØRꞸ 6
Dya mi bʼꞹbʼꞹ pje kʼo ro zu̱u̱ e David
Ma pje ri su̱ge, ¿pje ri tsjage?... Bʼꞹma ri xipji ni tara o ni nana ra mbøxkʼꞹ ngekʼua dya ri su̱ge. ¿Kjo nge kʼꞹ xo ra mbøxkʼꞹ?... Ja̱a̱, e Jehová søø ra mbøxkʼꞹ, angeze xe nda na zɇzhi ke na nge yo ntee. Ma ri dyøtꞹ e Jehová, angeze ra mbøxkʼꞹ ngekʼua dya pje ri su̱ge, je ga kjanu go tsjaa e David. Angeze mi enchʼe kja o mꞹbʼꞹ e Jehová, ngekʼua ma mi trʼii dya pje mi su̱u̱. Ra xørꞹji pje go tsjaa e David.
Ndeze ma kja mi tsʼitrʼi e David, o jyote ñe o ñꞹʼꞹ mi jichi ro tsjaa kʼo mi nee e Jehová. Ngekʼua zo pje nde go kjogꞹ, angeze dya mi su̱u̱. E David mi jobi e Jehová ñe mi pa̱ra̱ kʼꞹ ro mbøsʼꞹ. Na nu paa e David mi kʼasʼꞹ o nzhenchjꞹrꞹ, ¡dʼangua zⱥtrʼⱥ na león ba zꞹrꞹ na ndenchjꞹrꞹ! ¿Gi pa̱rge pje go tsjaa e David? Go ma jyodʼꞹ kʼe león go mbøtrʼꞹ ko o dyɇɇ. Xo go mbøtrʼꞹ na oso ma mi nee ro zaa yo nzhenchjꞹrꞹ. ¿Kjo go mbøsʼꞹ e David ro tsjaakʼo?... Ja̱a̱, e Jehová go mbøsʼꞹ.
Na nu paa ma yo israelita mi chu̱ji yo filisteo, e David dya go zu̱u̱ ro chu̱bi e Goliat, ¡angeze mi xundaro kja kʼo filisteo, mi trʼabʼɇzo ñe mi ma nrra̱ʼa̱! E Goliat mi trjembe yo xundaro israelita xo mi sadʼꞹ e Jehová. Mi xipji yo xundaro: “¡Kjo ra chu̱gobʼe!”. Dya kjo mi nee nange me mi su̱ji e Goliat. Ma e David go dyⱥrⱥ ja ma ñaa e Goliat, e David go xipji: “¡Ra chu̱gobi! ¡E Jehová ra mbøxkꞹ ngekʼua ra to̱nkʼꞹ!”. ¿Ixi na kjuana e David dya pje mi su̱u̱?... Ja̱a̱, angeze dya kjo mi su̱u̱. Xi ra nuji pje go kjogꞹ.
E David go jñꞹsʼꞹ tsʼicha tsʼirojo, mi kana nu trʼenzho, kjanu go ma chjɇbi e Goliat. Ma go jñanrra e Goliat kʼꞹ kja mi trʼii e David, go ndembe. Nuʼma e David go xipji: “Ba e̱kjeba, ba ne pøtʼkꞹgo ko in trʼatrjedyi, ¡pe e Jehová ra mbøxko ra to̱nkʼꞹ!”. Nudyakʼua e David o jñutrʼꞹ na tsʼirojo kja nu trʼenzho, kjanu o bʼꞹgꞹ ja mi bʼꞹbʼꞹ e Goliat go pjatrʼꞹ kʼe tsʼirojo. Nu tsʼirojo jotrjo ba ndontʼꞹ a nzhe̱e̱ e Goliat. ¡Ixko nꞹgꞹ e Goliat ba nrru̱u̱! Ma go jñanrrajikʼo yo filisteo, me ko pizhiji, dabadiji go kʼueñeji. ¡Zo kja mi trʼii e David go ndo̱mpꞹ chu̱ʼu̱ e Goliat! ¿Kjo nge kʼꞹ go mbøsʼꞹ e David ro ndo̱mpꞹ e Goliat?... E Jehová go mbøsʼꞹ, ¡angeze xe nda na zɇzhi ke yo trʼabʼɇzo!
E David dya kjo mi su̱u̱ nange mi pa̱ra̱ ke e Jehová mi pjøsʼꞹ
¿Pje jitsʼkoji kʼo go tsjaa e David?... Xe nda na zɇzhi e Jehová ke yo ntee. Ma ra bʼꞹbʼꞹ dʼa paa ke ri su̱ge, e Jehová søø ra mbøxkʼꞹ ngekʼua dya ri su̱ge, akjanu søø ri jobi e Jehová.
