Uzye ukacita uli ndi uvwa intete?— Limwi ukautukila kuli yamayo yako nanti yatata yako ukuti yakwazwe. Nomba, kwaya namuze angakwazwa. Wene wakwatisya amaka ukucila antu yonsi. Uzye wamumanya?— Ee, a Yeova Leza. Leka tulande pa mulumendo wino ilyasi lyakwe lyalembwa muli Baibo, uwiziina lyakuti Davidi. Wamanyile ukuti Yeova wali nu kumwavwa lyonsi sile, fwandi acino ataakwatiile intete.

Ukufuma pa nsita ino Davidi wali akanya, avyazi yakwe yaamusambilizye ukutemwa Yeova. Cii caleenzile ukuti Davidi atauvwa intete lino ivintu vimwi ivyakutiinya vyamucitikila. Davidi wamanyile ukuti Yeova wali a Cuza wakwe nupya wali nu kumwazwa. Wanda umwi, lino Davidi wacemanga imfwele, kwizile cisama umukulu sana uwizile alema imfwele yonga, ailuma! Uzye watuumanya vino Davidi wacisile? Wazinginye cisama wiyo, ayamulema nu kumukoma ni minwe sile! Na lino icinyama cino yaka-ama ukuti cibeele calemile imfwele, Davidi wacikomile naco kwene! Ukwelenganya ukuti a weni uwavwilizye Davidi?— Ee, a Yeova.

Kwali insita nayuze lino Davidi wasifile sana. Aina Izlaeli yaalwanga na antu yano yaamanga ukuti aaFilisiti. Umusilika wenga uwa ya Filisiti wali umutali sana, nupya wali ipombolo! Izina lyakwe wali a Golyati. Umusilika kwene wii ipombolo, wasowekanga asilika ya ina Izlaeli alino na Yeova. Waneenanga aasilika ya ina Izlaeli ukuti yaye uku kulwa nawe. Nomba, aina Izlaeli yonsi kwene yuvwanga sana intete ukuya uku kulwa nawe. Lino Davidi uvwile, waneenyile Golyati ati: ‘Indi nu kulwa naawe! Yeova amangazwa, nupya namakucimvya!’ Uzye ukwelenganya ukuti Davidi wali umusipe nanti foo?— Ee, wali umusipe sana. Uzye ukulonda umanye iviizile ivicitika ukufuma paapo?

Davidi wasenzile legeni wakwe alino na mawe 5, nupya wayile uku kulwa ni pombolo liili. Lino Golyati waweni vino Davidi walolekanga ukuti u mwance sana, watandike ukumusoweka! Nomba, Davidi wanenyile Golyati ati: ‘Ukwiza kuli neene nu lupanga, nomba nemo nkwiza kuli wewe ni zina lyakwe Yeova!’ Lyene Davidi watoozile iwe aika muli legeni wakwe, asimula ukulungama  Golyati, nu kulivwintila kuli Golyati. Iwe lilyo lyaile litama Golyati pakasi ka manso! Avino ipombolo lyaponyile pansi, ala lyati-lifwa! Aafilisiti yuvwile intete nupya yonsi kwene yuutwike. Uzye cali uli pakuti akalumendo akance wakwe Davidi kacimvye ipombolo?— Yeova u wavwilizye Davidi, nupya Yeova wakwatiisye amaka ukucila ipombolo kwene liili!

I vyani vino ungasambilila ukwilyasi lyakwe Davidi?— Yeova wakwatisya amaka ukucila antu yonsi. Nupya a Cuza wako. Fwandi lyonsi lino uvwa intete, uwaiusya ukuti Yeova angakwavwa ukusipa!