Ta eo kwõnaaj kar kõm̦m̦ane ñe kwõj mijak?— Bõlen kwõnaaj etal im kappok jipañ ippãn jem̦am̦ im jinem̦. Ak ebar wõr juon emaroñ jipañ eok im el̦apl̦o̦k an kajoor jãn aolep. Kwõjel̦ã ke wõn eo ekajoorl̦o̦k jãn aolep?— Jeova Anij. Jen kiiõ bwebwenato kõn juon l̦addik ilo Baibõl̦, etan in Devid. Aolep iien ear jel̦ã bwe Jeova enaaj jipañ e, eñin unin ear jab mijak.

Jãn ke Devid ear niñniñ, jemãn im jinen rar katakin e ñan yokwe Jeova. Men in ear jipañ Devid bwe en jab mijak ñe ej wal̦o̦k men ko rekaamijak ñan e. Devid ear lukkuun epaake Jeova im jel̦ã kajjien. Kõn men in, ear jel̦ã bwe Jeova enaaj jipañ e. Juon iien ke Devid ear lale jet jiip, juon l̦aiõn kileplep ear jãdetok im kiji juon jiip im ko kake! Kwõjel̦ã ke ta eo Devid ear kõm̦m̦ane? Ear kõpl̦e l̦aiõn eo im jibwe im m̦ane! Im ke juon pããr ear tõn m̦ane jiip ko, Devid ear bar m̦ane pããr eo! Kwõl̦ak lale wõn eo ear jipañ Devid?— Jeova Anij.

Ebar wõr juon iien me Devid ear kwal̦o̦k an jab mijak. Ej ilo iien eo me Ri Israel ro rar tarin̦ae ippãn Ri Pilistia ro. Juon iaan rũttarin̦ae ro an Ri Pilistia ro ear lukkuun aetok im peñpeñ! Etan l̦ein in Golaiat. L̦ein el̦akkar kajjirere kõn rũttarin̦ae ro an Israel im kõn Jeova. Ear ba bwe rũttarin̦ae ro an Israel ren etal im ire ippãn, ak aolep im mijak e. Ke Devid ear roñ men in, ear ba ñan Golaiat: ‘Inaaj ire ippam̦! Jeova enaaj jipañ eõ, im inaaj wiin jãn kwe!’ Kwõl̦ak lale Devid ear ke mijak?— Ear jab, ear peran. Kiiõ ta eo Devid ear kõm̦m̦ane?

Devid ear bõk buwat eo an im l̦alem dekã ippãn, im ear etal bwe en ire ippãn Golaiat. Ke Golaiat ear loe joñan an Devid dik jãn e, ear kajjirere kake. Ak Devid ear ba ñane: ‘Kwõj itok kõn jãje, ak ij wõj ilo etan Jeova!’ Im ear kõl̦aak juon dekã ñan buwat eo an im ettõrl̦o̦k ak ej buwate l̦o̦k Golaiat, im ear lel dem̦an!  Golaiat ear okjak ñan lal̦ im mej! Ri Pilistia ro rar mijak im rar ko. Etke Devid ear maroñ in wiin jãn Golaiat ke edik jãn e?— Jeova ear jipañ e, im el̦apl̦o̦k an Jeova kajoor jãn Golaiat!

Ta ko kwõj katak jãn Devid?— Kwõmaroñ katak bwe Jeova ekajoorl̦o̦k jãn aolep armej im ej juon m̦õttam̦. Im ñe kwõbar mijak keememej bwe Jeova emaroñ jipañ kwe ñan peran wõt im jab mijak!