¿Sibrin sma taim dîa daukisma?... Ban kra papikam apia kaka mamikam ra hilp makabisma. Kuna ¿nu sma yaura sin hilp makabaia sip sma?... Âu, Jehova. Witin ba kau karnakira sa upla nani wal. Piua bani karnika maikbia makabaia sip sma. Debit baha daukan. Witin wahma kum sîa briras kan, kan Jehova ra kasak luki kan. Ai sturka ba Baibil ra sa.

Debit tuktan kan piua wina, ai aisika nani ba witin ra smalkan Jehova ra latwan kaikaia. Ba mita si briras kan trabil bâra kan piua ra. Witin nu kan Jehova ba ai pânika kabia bara sip kan hilp munaia. Yu kum, Debit ba ai sîpka nani main kaiki kan taim, ¡layan kum bal tila wina kum brih wan! ¿Debit dîa daukan? Layan ra nina bliki, bara ai mihta ni layan ra ikan talia sa. Bara wingku kum sîp nani ra alkaia trai kaikan taim, baha sin ikan. ¿Ya mita Debit ra hilp munan sibrin âpu kaia?... Rait aisisma, Jehova.

Piua wala ra sin Debit ba sibriras kan. Israel uplika nani ba filisteo nani ba wal aiklabi kan piua ra. Filisteo suldiarka nani tilara kum ba nina Goliat, waitna uba yari kan, ¡waitna tarka tara kum kan! Goliat ba Israel suldiarka nani lawaska kiki kan an Jehova mapara sin. Suldiar nani ra wi kan: “¡Kapu, ya yang wal aiklabaia want sa!”. Sakuna sut ba sîa bri kan, bara upla kumi sin witin wal aiklabaia want apia kan. Debit Goliat aisan ba walan taim, pana win: “¡Yang lika man wal aiklabamna! ¡Jehova hilp ai munbia win mai munaia!”. ¿Rait apia Debit ba kasak pali sibriras kan?... Âu, sibriras kan. ¿Ningkara dîa takan?

Debit walpa lalalni 5 brin an praukpraukia kum, bara waitna tarka tara wal aiklabaia wan. Goliat Debit ra kaikan uba wahma sa, ba mita ai lawaska kikan. Kuna Debit witin ra win: “Man ba, ispara kum wal yang ra aulma sa, ¡kuna yang man ra auna Jehova nina wal!”. Debit ba Goliat mapara plapan. Ba wina praukpraukika ra walpa kum mangki si lulkan. Walpaya ba ai nakra purara saban, ¡bara Goliat ba prui, tasba kat kauhan! Filisteo nani kaikan  taim, sirang iwi plapan. ¡Wahma lupia kum Debit baku sip kan waitna tarka tara kum ra ikaia Goliat kata baku! ¿Dîa muni win takan?... Jehova witin ra hilp munan ba mita, ¡bara witin kau karnakira sa waitna tarka tara kum ba wal!

¿Debit sturka ba dîa wan smalkisa?... Jehova lika kau karnakira sa upla nani ba wal. Ba mita, yu kum sibrin sma kaka, kupiam krauks: Jehova pâmnika sa an witin sip sa hilp mai munaia sibrin âpu kaia.