¿Tlake tijchiua kema timajmaui?... Uelis tia kampa motata o monana pampa tijneki ma mitspaleuikaj. Maske inijuantij uelis mitspaleuisej, itstok se akajya tlen kipia miak chikaualistli katli nojkia uelis mitspaleuis. ¿Tijmati ajkia?... Jehová. Ipan ni tlapoualistli tikitasej kenijkatsa se telpokatl tlauel motemachik ipan Jehová. Amo majmauiyaya, pampa kimatiyaya Jehová nochipa kipaleuiskia. Ni telpokatl motokaxtik David, uan Biblia techiljuia tlake kichijki.

Kema David eliyaya pilokichpiltsi, itatauaj kimachtijkej tlen Jehová uan yeka tlauel kiikneliyaya. Yeka maske kipanok miak tlamantli, amo majmajki. Ya kimatiyaya Jehová kipaleuiskia pampa eliyaya iuampo. Se tonali, kema David kinmokuitlauijtoya iborregojuaj, se león kinekiyaya kikuas se pilborregojtsi. ¿Tijmati tlake kichijki David? Kitokilik nopa león, kiitskito uan kimiktik. Uan seyok tonali, kema se oso kiuikayaya se pilborregojtsi, David nojkia kimiktik nopa oso. ¿Tijmati ajkia kichijki amo ma majmaui David?... Jehová.

Ipan seyok tonali David nojkia kinextik amo majmauiyaya. Ni panok kema israeleuanij moteuiyayaj ininuaya filisteaeuanij, nopaya itstoya se filisteaejketl tlauel uejkapantik, motokaxtik Goliat. Ya tlauel kipinajtiyaya Jehová uan israeleuanij. Maske Goliat kinekiyaya ma moteuikaj iuaya, amo aka kinekiyaya pampa nochi kimakasiyayaj. Kema David kikajki tlen Goliat kiijtouayaya, kiiljuik: “¡Na nimoteuis mouaya, uan nimitsmiktis pampa Jehová nechpaleuis!”. ¿Tikitak kenijkatsa amo majmajki David?... Kena, David nelia amo majmajki. ¿Mitspaktiskia tijmatis tlake panok teipa?

David kikuik makuili ajalaxtik tetl, se teuitlatstli uan kiteuito Goliat. Kema Goliat kiitak, pejki kiuetskilia pampa san eliyaya se piltelpokatsi, yeka David kiiljuik: “Ta tiuala ika se espada uan na nimitsteuis ika Jehová itetikayo”. Uajka David motlalok kampa itstoya Goliat, kitlalik se tetl ipan iteuitlats uan chikauak kimajkauilik. Ika nopa tetl kikuakoyonik uan kimiktik. Kema nopa filisteaeuanij kiitakej miktoya  Goliat, cholojkej pampa tlauel majmajkej. ¿Tijmati kenke David kitlanki nopa uejkapantik tlakatl maske eliyaya san se piltelpokatsi?... Pampa Jehová kipaleuik, uan ya nelia kipia miak chikaualistli. Yon se tlakatl amo kipia chikaualistli kej Jehová.

¿Tlake techmachtia ni tlapoualistli?... Techmachtia Jehová amo kej maseualmej, pampa ya kena kipia miak chikaualistli. Yeka kema timajmauis, xikilnamiki Jehová uelis mitspaleuis, pampa ya mouampo.