Iwewe paunonga wecithya unoitenyi?— Kangaije unoenda kuna mai kana baba vako koovakumbira besero. Asi kuno mundhu umweni angakubeseravo. Iyena ano simba maningi kupinda ari wese. Unomuziva kuti ndiani?— Hina ndi Jehovha Mwari. Ngatende tibhuye ngo pamusoro po mujaha umweni waidanwa Dhavhidhi. Iyena waiziva kuti Jehovha nguva jese waizomubesera, ngo kudaro iyena aacaithya.

Vabari va Dhavhidhi vakamujijisa kuda Jehovha kubvira paainga mwana mudoko. Izvi zvakabesera Dhavhidhi kuti atame kuva anothya zviro zvinothyisa zvakaitika kwaari. Iyena waiziva kuti Jehovha wainga Shamwari yake zve waizomubesera. Pa mukuvo umweni Dhavhidhi paainga ecingwarira mabvuta, mbhondoro huruwani yakavia yoruma bvuta rimwe! Unozviziva zvakaita Dhavhidhi? Iyena wakaigogomera zve zvinovoneka kuti wakaiuraya ngo nyara jake! Pasure pazvo bea parakabata bvuta, Dhavhidhi wakariurayazve! Unorangarira kuti ndiani wakabesera Dhavhidhi?— Hina ndi Jehovha.

Kuno mukuvo umwenizve Dhavhidhi waakatatija kuva akacunga maningi. VaIziraeri vainga vecitakana no vandhu vaidanijwa kuti vaFiristi. Umwe wo masoca o vaFiristi wainga mwanarume waikura, kukurisisa kamare, kuita zigakanyara! Zina rake wainga Goriati. Zigakanyara rondhoro rainga recishora masoca o vaIziraeri na Jehovha. Goriati wakaphikiza masoca o ciIziraeri kuti avie kuzohwisana naye. Asi vaIziraeri vese vainga vecithya kootakana naye. Dhavhidhi paakazwa zvondhozvo wakabvunja Goriati kuti: ‘Inini ndicazokuhwisa! Jehovha acandibesera zve ndicazokunyisa!’ Unorangarira kuti Dhavhidhi wainga wakacunga here?— Hina, kucunga maningi kamare. Unoda kuziva kuti zvicinyi zvakaitika tevere?

Dhavhidhi wakatora bvungamurara pomwe no mapuwe marongomuna akatisetete, woenda koohwisana no gakanyara riani. Goriati paakavona magariro ainga na Dhavhidhi, wakamurerusa. Asi Dhavhidhi wakamubvunja kuti: ‘Iwewe unovia kondiri no banga, asi inini ndinovia kwauri no zina ra Jehovha!’ Perapo iyena wakadira buwe pa bvungamurara  rake ogogoma ecienda kuna Goriati, womukhandirira. Buwe rakafura Goriati pa mutanda wo miro! Gakanyara rakawa pasi no rakafa! VaFiristi vakathya zvokuti vese vakatiza. Zvingaitisa kudini kuti mujaha wakadari inga Dhavhidhi angakwanisa kunyisa gakanyara?— Jehovha wakamubesera zve Jehovha wakava ano simba maningi kupinda gakanyara rondhoro!

Tingajijenyi kubvira ku ndhorondho ya Dhavhidhi?— Jehovha ano simba maningi kupinda ariwese. Zve iyena i Shamwari yako. Ngo kudaro pa vhaza yaunozothyazve, ceujai, Jehovha angakubesera kuva wakacunga!