Ke eng seo o se dirago ge o tšhogile?— Mohlomongwe o tšhabela go mmago goba go tatago. Eupša go na le motho yo mongwe gape yo a ka go thušago. Motho yoo o na le matla a magolo go feta batho ka moka. Na o a tseba gore ke mang?— Ee, ke Jehofa Modimo. Anke re bale ka mošemanyana yo mongwe wa ka Beibeleng yo a bitšwago Dafida. Dafida o be a tseba gore Jehofa o be a tla dula a mo thuša, ka gona o be a sa tšhoge selo.

Ge Dafida e be e sa le ngwana, batswadi ba gagwe ba ile ba mo ruta go rata Jehofa. Se se ile sa thuša Dafida gore a se ke a tšhoga ge a diragalelwa ke dilo tša go tšhoša. O be a tseba gore Jehofa ke Mogwera wa gagwe le gore O tla mo thuša. Nakong e nngwe ge Dafida a be a dišitše dinku, go ile gwa tla tau e kgolo gomme ya swara nku e nngwe ka meno. Na o a tseba gore Dafida o ile a dira eng? O ile a e kitimiša gomme a e bolaya ka diatla! O nagana gore Dafida o thušitšwe ke mang?— Ee, o thušitšwe ke Jehofa.

Go na le nako e nngwe yeo ka yona Dafida a ilego a ba sebete kudu. Ke nakong ya ge Baisiraele ba be ba elwa le setšhaba sa Bafilisita. Bjale go be go na le lešole le lengwe le letelele kudu la Mofilisita, e le monna wa senatla! Leina la gagwe e be e le Goliata. O be a kwera madira a Baisiraele le Jehofa. Goliata o ile a nyatša madira a Baisiraele gore a ka se mo fenye. Eupša Baisiraele ka moka ba be ba mo tšhaba. Ge Dafida a kwele ditaba tšeo, o ile a botša Goliata gore: ‘Nna ke tla lwa le wena! Jehofa o tla nthuša gomme ka go fenya!’ Na o nagana gore Dafida o be a na le sebete?— Ee, o be a na le sebete. Na o nyaka go tseba gore go ile gwa direga eng ka morago ga moo?

Dafida o ile a tšea seragamabje sa gagwe le maswika a mahlano gomme a ya go lwa le senatla seo. Ge Goliata a bona kamoo Dafida e bego e le yo monyenyane ka gona, o ile a mo kwera. Eupša Dafida o ile a re: ‘Wena o tla go nna ka tšhoša, eupša nna ke tla go wena ka leina la Jehofa!’ Ka gona Dafida o ile a tsenya leswika ka seragamabjeng, a kitimela go Goliata ke moka a mo foša ka lona. Leswika leo le ile la itia Goliata mo phatleng! Senatla seo sa wela fase ke moka sa  hwa! Bafilisita ba ile ba tšhoga kudu moo ka moka ga bona ba ilego ba tšhaba. Go tlile bjang gore mošemanyana wa go swana le Dafida a fenye senatla seo?— O se fentše ka thušo ya Jehofa ka gobane Jehofa o na le matla a magolo.

O ka ithuta eng ditabeng tše tša mabapi le Dafida?— O ka ithuta gore Jehofa o na le matla a magolo go feta motho le ge e le ofe. E bile ke Mogwera wa gago. Ka gona nakong e tlago ge o ikwa o boifa, o gopole gore Jehofa a ka go nea sebete!