Náníldzidgoshąʼ haa nitʼı̨́įh łeh?— Nima dóó nizhéʼé níká adoolwoł biniyé daatsʼí bichʼįʼ náádiilwoʼ. Ndi nááná łaʼda níká adoolwołígíí ałdóʼ hólǫ́ǫgo átʼé. Éí tʼáá ałtso diné biláahgo ayóí ábóodziil. Háísh átʼı̨́ nínízin?—Aooʼ, Jiihóvah God. Diyin God Bizaad biiʼdę́ę́ʼ ashkii léiʼ David wolyéego bee ahił hodiilnih. David bił bééhózingo éí Jiihóvah tʼáá áłahájįʼ bíká análwoʼ. Éí biniinaa doo náldzid da ńtʼééʼ.

David tʼah awééʼ jílı̨́įgo, hamá dóó hazhéʼé Jiihóvah ayóíʼájóʼníi doogi yee nahaneeztą́ą́ʼ. Áko David báádahadzidii bichʼįʼ áhooníiłgo, doo nídzíldzidgóó ájítʼéego yee háká eelwod. Hoł bééhózingo éí Jiihóvah hakʼis nilı̨́, dóó tʼáá aaníigo éí háká adoolwoł. Łah dibé baa áhojilyą́ągo, náshdóítsoh bitsiijįʼ ditłʼoii léiʼ dibé yiztsahgo yił dah diilwod! David haash yidzaa nínízin? Náshdóítsoh bitsiijįʼ ditłʼoii yikééʼ nídiilwod, áádóó bidághaaʼ jisxiłgo hálaʼ bee jiisxı̨́! Áádóó shash léiʼ dibé yaatiih yíyáago, éí ałdóʼ náájiisxı̨́! Háíshąʼ David bíká eelwod nínízin?—Aooʼ, Jiihóvah.

Áádóó nááná łah David tʼáadoo náhineesyiz da. Ízrel dineʼé éí Filístiya dineʼé daolyéego yił daʼahigą́. Filístiya dineʼé bisilaó bá ndaabaahii tʼáá łáʼígo ayóí áníłnééz, éí yéʼiitsoh jílı̨́. Éí Goláíyath wolyé. Díí yéʼiitsoh éí Ízrel dineʼé bá ndaabaahii danilínígíí, dóó Jiihóvah tʼóó yá nahałtʼiʼ. Goláíyath éí Ízrel dineʼé ndaabaahii yíheedáahgo wóshdę́ę́ʼ shił daʼahogą́ yił níigo saad yííʼááh. Ndi Ízrel dineʼé yéʼiitsoh bił daʼahizhdoogą́ąłgi béédajildzid. David éí díí yaa hodiiztsʼą́ąʼgo Goláíyath kwííłní: ‘Shí nił ahideeshgą́ą́ł! Jiihóvah éí shíká adoolwołgo nikʼeh dideeshdleeł!’ Davidísh doo náhinilyées da nínízin?—Aooʼ, doo náhinilyées da. David haa náánádzaaígíísh nił bééhodoozįįł nínízin?

David bibee aditłʼı̨́hı̨́ dóó tsé dadilkǫǫhígíí ashdlaʼgo dah yidiijaaʼ. Bee aditłʼı̨́hı̨́ éí tsé bee aheltłʼiidgi chooʼı̨́. Éí yéʼiitsoh bił ahizhdoogą́ą́ł biniyé bichʼįʼ jiníyá. Goláíyath éí David tʼah ashkii lágo yaa ákoniizı̨́ı̨́ʼ, áádóó tʼóó há náhodiiłtʼiʼ. Ndi David áháłní: ‘Ni éí nidiltłish bee shichʼįʼ híídááł, ndi shí éí Jiihóvah bízhiʼ bee nichʼįʼ heeshdááł!’ Áádóó bibee aditłʼı̨́įhii  tsé yiih yiyííʼą́ągo, Goláíyath yichʼįʼ yił nídiilwod, áádóó tʼáá kʼéhézdon yichʼįʼ yee adzííłneʼ. Tsé yee Goláíyath bitááʼ góneʼ bibee aditłʼı̨́hı̨́ yee néiidííłneʼ. Yéʼiitsoh yę́ę neʼjįʼ adzííłhaalgo daaztsą́! Filístiya dineʼé yéigo nídaasdzíidgo ałtso ííjééʼ. Haash yitʼéego David tʼah ashkii jílı̨́įgo yéʼiitsoh bikʼeh jideesdlı̨́ı̨́ʼ?—Jiihóvah bíká eelwod, áádóó ałdóʼ Jiihóvah éí yéʼiitsoh biláahgo ayóí ábóodziil!

David baa haneʼígíí haʼátʼíísh bitsʼą́ą́dóó baa íhwidííłʼááł?—Jiihóvah éí tʼáá ałtso diné biláahgo ayóí ábóodziil. Áádóó ałdóʼ nikʼis nilı̨́. Áko béénílniih, nínáá síníldzíidgo Jiihóvah doo náhinílyéésgóó ándoolííł!