ƐZUKOALƐDEƐ 6
Devidi Anzulo
Saa ɛzulolɛ ka wɔ a duzu a ɛyɛ a?— Bie a ɛkɔ wɔ mame nee wɔ papa ɛkɛ ne kɛ bɛboa wɔ. Noko awie bieko wɔ ɛkɛ mɔɔ ɔbahola yeaboa ɛdawɔ noko a. Ɔlɛ tumi kpole ɔtɛla awie biala. Ɛze ahenle holɛ ko ɔ?— Gyihova Nyamenle ɔ. Maa yɛha Baebolo ne anu kpavolɛ bie mɔɔ bɛfɛlɛ ye Devidi la anwo edwɛkɛ. Ɛnee ɔze kɛ Gyihova baboa ye dahuu, yemɔti yeanzulo.
Devidi ngakula nu, ye awovolɛ hilele ye kɛ ɔhulo Gyihova. Ɛhye boale Devidi yemɔti yeanzulo wɔ mekɛ bɔbɔ mɔɔ ninyɛne mɔɔ yɛ ɛzulolɛ dole ye la. Ɛnee ɔze kɛ Gyihova le ɔ Gɔnwo yɛɛ Ɔbaboa ye. Kenle ko bie mɔɔ ɛnee Devidi ɛlɛnea ye mboane ne la, awenade kpole bie rahyele ko! Ɛze mɔɔ Devidi yɛle a? Ɔdoale awenade ne toonwo ɔhyele ye na ɔhunle ye! Mekɛ mɔɔ bedi noko rale mboane ne anwo zo la, Devidi hunle ɔdaye noko! Ɛnea a nwane a boale Devidi a?— Gyihova a boale ye a.
Mekɛ bie noko anu Devidi nyianle akɛnrasesebɛ titile. Ɛnee Yizilayɛma nee Filisitiama ɛlɛko. Filisitiama sogyanli ko ɛnee le sonla tendenle kpole, kakanyinli bie! Bɛfɛlɛ ye Golayate. Ɛnee kakanyinli ɛhye ɛlɛgolo Yizilayɛ sogyama nee Gyihova anwo. Golayate hanle hilele Yizilayɛ sogyama ne kɛ bɛye bɛ nyunlu na bɛrɛla bɛmaa bɛho. Noko Yizilayɛma kɔsɔɔti zulole kɛ bɛ nee ye kɛho. Mekɛ mɔɔ Devidi dele la, ɔhanle ɔhilele Golayate kɛ: ‘Me nee wɔ baho! Gyihova baboa me, na meali ɛ nwo zo konim!’ Ɛnea a Devidi nyianle akɛnrasesebɛ ɔ?— Ɛhɛe, ɔnyianle akɛnrasesebɛ kpole. Ɛkulo kɛ ɛnwu mɔɔ zile bieko la ɔ?
Devidi vale ye totoabɔ ne na ɔsesale awolɛ nnu, na ɔhɔle kɛ ɔkayia kakanyinli ne. Mekɛ mɔɔ Golayate nwunle kɛzi Devidi le kakula la, ɔgolole Devidi anwo. Noko Devidi hanle hilele ye kɛ: ‘Wɔmɔ ɛnee konle dadeɛ yɛɛ ɛra a, na mame, Gyihova duma nu a mera a!’ Devidi vale bolɛ ko wulale ye totoabɔ ne anu, ɔnriandile ɔhɔyiale Golayate, na ɔdole ɔbɔle ye. Bolɛ ne yiale ɔ nwoma azo! Kakanyinli ne dɔle aze na ɔwule! Ɛzulolɛ hanle Filisitiama na bɛ muala bɛnriandile. Kɛ ɔyɛle mɔɔ kakula le kɛ Devidi holale hunle kakanyinli ɛ?— Gyihova boale ye, ɛnee Gyihova tumi ne le kpole tɛla zɔhane kakanyinli ne!
Devidi anzulo ɔluakɛ ɛnee ɔze kɛ Gyihova baboa ye
Duzu a ɛsukoa ɛfi Devidi edwɛkɛ ne anu a?— Gyihova lɛ tumi kpole tɛla awie biala. Eza ɔle ɛ Gɔnwo. Yemɔti kenle fofolɛ mɔɔ ɛzulolɛ baha wɔ la, kakye kɛ, Gyihova bahola aboa wɔ yeamaa wɔanyia akɛnrasesebɛ!
