Естӕмӕй ку фӕттӕрсис, уӕд ӕнхусмӕ кӕмӕ фӕлледзис? ~ Ӕвӕдзи, дӕ мадӕ кенӕ дӕ фидӕмӕ. Фал ма ес, мадӕ ма фидӕй фулдӕр хъаурӕ кӕмӕ ес, уӕхӕн кадӕр. Е ӕгасемӕй хъаурӕгиндӕр ӕй ӕма дин банхус кӕндзӕй. Зонис ӕй, ка ӕй, уой? ~ Гъо, е ӕй Йеговӕ. Гъӕйдӕ нурба ӕркӕсӕн, Библи еу ӕригон биццеу Давиди туххӕй ци дзоруй, уомӕ. Давид нецӕмӕй тарстӕй, уомӕн ӕма ’й зудта, Йеговӕ ин алкӕддӕр ке банхус кӕндзӕй, уой.

Давид ма минкъий биццеу ку адтӕй, уӕд ӕй ӕ ниййергутӕ ахур кодтонцӕ, цӕмӕй Йегови уарзтайдӕ. Уомӕ гӕсгӕ некӕд нецӕмӕй тарстӕй. Давид ӕй зудта, Йеговӕ е ’мбал ке ӕй ӕма ин ӕнхус ке кӕндзӕй, уой. Еухатт ӕ фустӕ ку хизта, уӕд ин си домбай еу радавта! Зонис ӕй, Давид ци бакодта? Домбаййи баййафта ӕма ’й рамардта! Ӕндӕр хатт ба ин ӕ фуси арс радавта, ӕма уой дӕр рамардта! Куд дӕмӕ кӕсуй, Давидӕн ка банхус кодта? ~ Гъо, Йеговӕ.

Еухатт Давид ӕхе никки нифсгундӕрӕй равдиста. Израилӕгтӕ рацудӕнцӕ филистимӕгти нихмӕ тохунмӕ. Филистимӕгтӕй еу ӕфсӕддон адтӕй хъӕбӕр устур лӕг, уӕйуги хузӕн. Ӕ ном хундтӕй Голиаф. Еци уӕйуг израили ӕфсӕддонтӕбӕл ӕма Йеговӕбӕл гириз кодта. Голиаф ӕфсӕддонтӕмӕ дзурдта, зӕгъгӕ, ами уӕхӕн лӕг нӕбал ес, мӕ хӕццӕ тохунмӕ ка рацӕуа. Фал си Израили ӕфсӕддонтӕ тӕрсгӕ кодтонцӕ. Давид Голиафи дзубандитӕ ку фегъуста, уӕд ин загъта: «Ӕз рацӕудзӕн дӕ хӕццӕ тохунмӕ! Йеговӕ мин банхус кӕндзӕй, ӕма дин дӕ сӕр фӕттӕхун кӕндзӕн!» Куд дӕмӕ кӕсуй, Давид нифсгун адтӕй? ~ Гъо. Фӕндуй дӕ базонун, идарддӕр ци ӕрцудӕй, уой?

Давид райста дорӕхсӕн, удта фондз тъӕпӕн дори ӕма уотемӕй Голиафи размӕ рацудӕй. Голиаф ӕригон Давиди ку фӕууидта, уӕд никки хъӕбӕрдӕр ходун райдӕдта. Фал ин Давид загъта: «Ду мӕ нихмӕ хъӕмай хӕццӕ цӕуис. Ӕз ба дӕ нихмӕ цӕун Йегови номи хӕццӕ!» Уой фӕсте дорӕхсӕни дор ниввардта, Голиафмӕ хӕстӕгдӕр балигъдӕй ӕма ибӕл дор фехста. Еци дор ӕ тӕккӕ тӕрнихбӕл исуадӕй, ӕма къӕдзӕхи асӕ лӕг рахаудтӕй ӕма рамардӕй! Филистимӕгтӕ  хъӕбӕр фӕттарстӕнцӕ ӕма ледзӕги фӕцӕнцӕ. Куд дӕмӕ кӕсуй, уӕхӕн ӕригон биццеуи бон куд иссӕй уоййасӕ лӕги рамарун? ~ Гъо, Йеговӕ ин банхус кодта. Йегови рази еци уӕйуг неци адтӕй!

Давиди хабарӕй цӕбӕл ахур кӕнис? ~ Йеговӕ ӕгасемӕй хъаурӕгиндӕр ӕй, удта ма ӕй де ’мбал дӕр. Ӕма ескӕд естӕмӕй ку фӕттӕрсай, уӕд ӕй зонӕ, Йеговӕ дӕуӕн дӕр ке банхус кӕндзӕй!